窩輪成交36.11億元，增5.6億元。恒指輪繼續成為炒上落對象，C輪成交8.16億元，而P輪成交9.32億元，出現少見P輪成交多過C輪現象。
恒指C輪與P輪，有多隻於本月29日夠鐘，到咗末日階段，最後交易日係23日，即下周五，剩番6日玩。最活躍嘅C係3939；最活躍嘅P係3631。未來幾日，恒指每日高低波幅過百點，閒過立秋，兩隻輪幾個鐘頭內波幅20%以上，亦閒過立秋，做嘢最好咪重手。
恒指C輪3939：恒指昨日高低相差117點，3939最高價15.2仙，最低價12.3仙，波幅高達24%。喺最低位上車，到收市14.8仙沽出，原來已經有20%利錢落袋。過去幾日，炒即市嘅話，喺個市搖搖吓之時上車，到收市時收割，多數贏錢。不妨用咁嘅方式做嘢，跌市時買3939，見高價則落車，亦唔好高追。
恒指P輪3631：3631最高價5.2仙，最低價4.1仙，波幅重厲害，上到27%。喺大市最殘之時（P輪最高價）上車，到收市原來慘蝕21%。如果見個市升得百幾點，博回頭，則低買此輪。3631溢價0.3%，槓桿率42倍（有效32.3倍），引伸波幅13.2%。
章盛