港股失方向，淡友趁機試底，一度將大市質破15000水平，睇吓承接力有幾強，恒指跌至14979就回升，倒升16點，收報15086，成交增至170.46億元，都算係一個小型單日轉向。但大市弱勢未改，市場除觀望議息結果，更關注大戶點樣睇近期油價下跌，如果大戶認為油價下跌，是反映全球經濟有問題，淡友一定惡過鬼。
媒體伯樂洽售控股權
繼金澤超分子（2362）宣布控股權易手後，媒體伯樂（8072）又話大股東洽售股權，可能出現控股權易手及提出全購。不過，媒體伯樂停牌前1日已急升28%，加上賣殼仍未成事，所以股價升至0.93元就回頭，收報0.86元，僅升3.6%，成交448萬元。
現時全世界都對中國市場虎視眈眈，一些在國內有發展潛質的業務，自然成為外資的搶手貨，一旦上市公司大股東擋唔住對方的銀彈攻勢，就會賣盤，而小股東亦會受惠，相信呢類股權易手情況陸續有來，話唔定市場又會掀起一股尋寶熱潮。
媒體伯樂每股資產淨值應該唔過0.60元，以去年每股賺0.024元計，PE約35倍，買家會否再出更高溢價收購，實在好難講，不過近期三四線股出現股權易手兼全購，股價多大幅升破全購價。
嘉華國際（173）中期賺6.32億元，增長306%，每股派1仙，另10送1嘉華建材（027）股份，嘉建公眾持股量將由25.05%增至28.18%。嘉國股東獲得分派當然開心，但嘉建街貨增加，股價難免受壓，對嘉建股東來講就唔係好事。嘉建中期賺1431萬元，冇息派。
阿虎