昨日講到九龍聖方濟書院校友之中，有好多係今日社會名人，其中盲人之星莊陳有比較特別。好耐以前，盲人讀書機會唔多，以心光機構專為盲人提供輔導服務及教育。喺「心光」讀書讀得好嘅學生，就被保送到九龍聖方濟。呢批盲人學生入到聖方濟，讀書非常勤奮，成績甚佳，莊陳有係表表者，後來更考入香港大學㖭。據一位聖方濟校友講：「香港俗語有話：盲嘅都識啦，意思係話一啲事物極為淺易，盲人睇唔到都會學識。但喺我哋學校，唔講得笑，話盲嘅都識啦就未必啱，因為盲人同學識，我哋開眼同學反為唔識，佢哋讀書勤力好多㗎！」
九龍聖方濟其實冇乜錢，冇特別設施提供畀盲人學生，只有一顆熱愛教育之心，鼓勵視覺障礙學生勤奮向上，眼睇唔到，仍然可以學業事業有成。呢類情懷，今天或已成為稀有事物。
至於歌神許冠傑，唔係英華書院學生咩，人人都知道佢係英華仔㗎喇？據一位聖方濟校友講，當年唔少人讀到中五就轉去名氣較大嘅中學讀預科，例如梁定邦中五後轉去華仁，許冠傑就轉咗去英華。如果用中六中七計，咁樣滙豐大班鄭海泉就算係九龍總商會英文中學校友，其實佢與鄭經翰、李少光等都係長沙灣九龍工業中學畢業嘅。
無論甚麼中學畢業，名校好，野雞私校也好，能夠成材嘅學生，主要靠自己，如果個個名校學生都能夠自動成為范鴻齡、許冠傑、曾蔭權、許仕仁，咁樣我哋讀Band5學校（如左丁山）出身嘅人，咪一早俾人批死冇前途？事在人為啫，讀書靠自己，出人頭地就要靠自己加上一啲運氣，千祈咪胡亂自我菲薄，讀唔到大學，做孤獨的推銷員，都可以成為特首啫。