有個日本旅客，留低一隻價值逾百萬嘅手表喺酒店嘅保險箱，警方尖沙嘴分區助理室助理文書主任李國眉又登報紙、又聯絡酒店同領事館，都搵唔到物主；原來物主返咗日本之後遇到交通意外，長時間昏迷，手表要喺一年後先物歸原主。
呢個為表尋人記，只係李國眉眾多難忘事件之一，佢喺最新一期《警聲》入面話，有個喺新西蘭留學嘅學生留低咗個行李箱，茫無頭緒下，佢哋見到裏面有張學生相，認出間學校名，之後上網搵學校聯絡方法，最後送番個行李箱畀個學生，搞到個學生好開心。今時今日，有啲咁好嘅服務態度，八方聽到都為香港人開心埋一份。
傳真︰2623-9278
電郵︰[email protected]