早前都話大陸地產股有得炒啦，兩隻廣州地產股合生創展（754）同富力地產（2777），近排股價屢創新高，好似叮噹馬頭咁鬥餐飽。
小初問經紀黃兩隻股炒到咁高重跟唔跟得過？佢話兩隻廣州地產股街貨都好疏，就算要再挾上，一啲都唔出奇。
富力同合生最近先後公布中期業績，其中富力盈利有6.5億元，比去年同期勁升6.7倍，至於合生亦唔差，中期盈利勁升1.9倍至3.97億元。
經紀黃話，富力上市以來，貨源主要由幾個大芬坐晒，而個別芬佬重一直密密增持，股價自然好似坐火箭咁升，隻股由7月中到𠵱家，已經升咗8成，但仍然有分析員將目標價訂到20元樓上，即係較現價重有幾十個巴仙上升空間，真係唔到你唔服。
合生上市時間長好多，但都係到近排成交先至較活躍。早前合生引入淡馬錫同老虎基金，集資10億銀，公司除負債比率大降，亦多咗人留意，但有分析員覺得股價升咗咁多，家陣一啲都唔平。
慕容小初