大曾歸去，老鼠落戶，特區政府終於可以鬆一口氣，回復正常運作，處理日常事務，例如搵番啲馬仔填補多位高官退休之後嘅空缺。
官場呢類人事變遷，事前消息多。房屋局常秘CM梁展文，盛傳十一月退休，由漁農署署長陳鎮源頂上。呢個消息應該好堅，但個日子就有變數，事關領匯重新上市，照計應該由CM一手一腳搞埋，冇理由中途換人。所以CM或者要再坐一陣，肥陳就要等多陣。
講起CM，真係好多古仔，高官之中，佢都好用心從政。聞說阿董以前搞腦震盪會，佢就非常勇猛，經常發表偉論，深得董生歡心，聽講阿董心中屬意佢坐林煥光個位，重準備叫佢提早退休做主任㖭。點知CM領匯搞出大頭佛，阿董亦因為呢件事被人叮咗，咁個特首辦主任就要易覓高人，你話世事幾妙呢。不過，煲呔都算關照班老公務員，唔搵人你做主任，都會同你搵番個位，等你唔使騎牛搵馬而係可以騎馬搵銀，做其馬術專員。
提起領匯依然心生不忿
至於肥陳，佢本來係新聞處長，阿董起用蔡瑩璧之後，調咗佢去睇住啲雞睇住啲魚，實在係大材小用，但塞翁失馬，漁農署呢亭守水塘位，在七年惶恐嘅日子係最好嘅養晦地方，就算最近啲淡水魚有石綠，啲四川豬又發瘟，肥陳都冇乜嘢上身。皆因呢啲魚同豬都係進口嘅，關周一嶽事多啲。
禮拜日晚在大曾個Party，八方都見到CM。佢同日本領事、盛智文、何俊仁等坐埋一枱，聽講佢提到領匯單嘢重心生不忿，認為司法覆核門檻太低喎，咁當然冇人敢問佢幾時離開房屋局啦。而肥陳目前身在印尼，參加一個亞洲經濟合作會議，講吓海洋資源。哈，唔知有冇順便討論埋點樣保育鱷魚呢，如果講呢瓣，陳署長養到貝貝咁肥，一定夠晒資格為港爭光。
傳真︰2623-9278
電郵︰[email protected]