鄭欣宜在迪士尼開幕晚會上化身成白雪公主後，被指場面令人惡心及嚇壞小朋友，影視處更接獲三百多宗投訴。本報記者昨日訪問街坊，看看欣宜是否如投訴般令人不安。
郭氏姊妹：
唔會覺得佢討厭，亦都唔係咁乞人憎，但係就覺得佢講嘢好作狀，而且太過騷英文，佢應該踏實啲。不過都覺得佢幾慘，因為有啲係無中生有，如果佢加入娛樂圈都會捧場。
張先生：
都幾欣賞佢，當晚嘅表演都好稱職。我覺得佢應該要加入娛樂圈，因為佢父母都係呢行，自己到時都會捧場。佢俾人批評，娛樂圈不嬲都係咁，好多時啲評語都係好壞參半，但係自己就覺得佢再收吓身就好。
李先生：
我覺得佢唔討人厭，係有啲人誇張啫，都同意佢加入娛樂圈，自己就保持中立，唔會話特別捧場囉。
