民主黨主席李永達（圖）雖然冇得同大曾坐低傾吓偈，但佢喺大曾個party就同中聯辦副主任周俊明同枱，雙方都溝通咗成粒鐘，算係攞番個安慰獎。坐喺A圍嘅達仔，隔籬重有新世界鄭裕彤，達仔話，彤叔冇主動同佢傾偈，淨係佢撩彤叔講嘢，不過彤叔都幾好傾喎！
達仔問彤叔：「樓價升咁多實好好賺啦！」彤叔話：「最好都係平穩，跟通脹升就得啦。」達仔話：「今年通脹得一個巴仙，我哋都唔反對咁升。」講完樓市，達仔重勸彤叔：「純官都咁大，你都可以多啲休息啦。」睇嚟彤叔都係唔多信純官，竟然答話：「點都要理吓、點都要睇吓嘅！」
另外，《南華早報》噚日話，煲呔趁大曾喺香港做家訪期間，當面篤工聯會棠哥、黃國健同譚耀宗，同大曾講工聯會應該多啲支持佢！八方搵過阿譚同黃國健，想問吓係咪有呢回事，不過佢兩個冇回覆喎。
傳真︰2623-9278
電郵︰[email protected]