成日聽人講：「食粥食飯睇呢鋪喇！」好似人人都認為食飯一定和味過食粥。大家有所不知，我國「四大發明（食品）」之粥、粉、麵、飯，粥居首位；粥在我國已有數千年歷史，可增進食慾，唔係病人先食。靚粥要綿、材料要鮮，近日側聞有一間粥舖這兩者都做得到，而且一碗北菇帶子蝦粥，嗰粒帶子乒乓波咁大，都係賣$33，今次就帶大家殺入荃灣，食矜貴靚粥！
記者：盧家蕙
攝影：周旭文、伍慶泉
Model：Cookie（TheGroup）
瑤柱鯊魚骨打響名堂
裕發在美孚早已打響名堂，開業短短一年，已經有不少捧場客，皆因其砂鍋粥粥底頂呱呱，今回進駐荃灣開新分店。老闆林生說：「我哋用來自美國的鯊魚骨和日本瑤柱做粥底，用上等香米熬足一整天，粥底用料上乘，成本都幾高㗎。」的確，很少見別家的粥店用上這些貴價材料做粥底，難怪粥一端上來，陣陣瑤柱味就湧出來。「這裏的粥底至少煲三小時，其間要不停攪拌，以防黏底。曾經試過煲燶底，整鍋也倒了，所以一定要格外留神。」
砂鍋生滾夠保溫
不少食客試過後，都大讚這裏的粥底十分稠身，加上瑤柱味濃，食落特別香綿幼滑。林生又說：「粥底過夜會變黃的，所以過夜就會倒掉。」至於點解要用砂鍋上（粥煲好放入砂鍋，再落粥料開火生滾），老闆話貪砂鍋夠晒保溫，食到咁上下，都唔會變成一灘水咁話喎！粥料方面，三個師傅每天清晨就去街市入貨，以確保材料日日新鮮。最煞食當然係以街坊價食到矜貴海鮮粥啦。所有粥料都可以自由配搭，以下是師傅推介的6款靚粥。
北菇帶子蝦粥$33
老闆話現在的新鮮帶子污染得太厲害，寧願用來自澳洲的急凍鮮帶子。以秘製醃料醃好的帶子，成個乒乓波咁大，不可直接放入粥生滾，否則變硬兼縮水；北菇同樣要用蠔油先醃，生滾起來才出味。帶子爽口又大粒，鮮蝦補其鮮味之不足，令整碗粥甚為鮮甜味美。
鯪魚球粥$18
小記最欣賞呢度日日親手打製的鯪魚球，粒粒好似乒乓波咁大，不只爽滑彈牙，咀嚼之下，陳年果皮、新鮮芫荽散發出幽幽的香氣，令人回味不已，驚喜的是一碗有8粒，好讓我過足口癮。
北菇螺片蝦粥$33
嘩！啲螺使唔使咁大隻呀？林老闆笑說：「海鮮粥用料一定要新鮮，所以我哋用美國特大螺片，棄內臟選螺頭，醃好切成螺片，加上日本靚花菇同埋原隻鮮蝦一齊滾，吃起來特別爽甜。」無花無假，呷一口粥已覺鮮味濃郁，配料之多吃起來口感豐富。
北菇海參螺片粥$33
33蚊去茶餐廳食到海參同埋螺片？唔係呃鬼食豆腐，真係原條海參切片噃。老闆說：「我哋用嘅係婆參，因為佢肉多又爽口，浸足7日先煮得。」婆參高蛋白、低脂肪、低膽固醇、含有豐富膠質，食落滑嘟嘟又軟綿綿，跟爽甜的螺片配搭一流。
蠔豉豬肝粥$28
蠔豉好大件頭，未拎到埋身已經聞到蠔豉香；豬肝食落鬆化。原來老闆選用了中豬，因為佢啲肝會靚啲，生滾完都保持軟身，唔會好似細豬咁，個肝煮起來硬邦邦，咬唔落口。
泥鯭粥$25
小記至怕食泥鯭好似食咗成口泥嘅感覺，不過老闆拍晒心口話絕無泥味，姑且一試啦。咦，又真係無喎，重幾肥美新鮮。林老闆話：「泥鯭要選深海的，因為近岸的有油污味；滾嗰陣唔可以加薑，一定要用陳年靚果皮啦，唔係就會好重泥味。」哦，咁我可以放心食晒4條泥鯭了。
食客有Say
裕發砂鍋粥麵餐廳（24144223）
地址：荃灣大壩街71號地舖（荃灣廣場對面）
