睇電視訪問聽到吳君如最近正在補身，唔知佢用緊嘅係大內禁宮食療秘方還是採陽補陰吸星大法，反正聽到佢話補身，我又想補身，我用嘅方法極其簡單，就係飲鮮奶。
我由細到大都唔飲得奶，因為唔受得，飲親就會絞肚痛兼肚瀉，非常見效，後來知道係因為腸胃天生唔受得奶裏面嘅乳糖，好多唐人都有呢個問題。我只在兩國地方飲鮮奶，加拿大同埋北海道，因為好飲，所以就算絞肚痛都值得，雖然在香港都買到北海道雪印牛奶，但係總覺得在當地飲到嘅零舍好飲。
在加拿大的超級市場內，擺滿一整櫃的各式各樣鮮奶，Homo全脂奶、Skim脫脂奶、2%奶、1%奶、Butter牛油奶，最近重發現有脫乳糖的Lactose-free奶，雖然可免卻絞肚痛之苦，但飲落總覺得唔夠奶味，寧願飲番普通奶。如果肯畀貴少少，有一啲玻璃樽裝嘅靚奶，雖然都係2%奶，但係又香又滑，味又濃，飲落肚好似飲天然能量一樣，感覺好強壯。
在加拿大見到嘅土生東方年輕人大部份身形都好似Mr.Incredible一樣，上闊下窄，強壯如牛，皆因除咗做運動之外，佢哋個個由細到大都將奶當水飲，雪櫃內永遠有奶，政府為鼓勵大家飲奶，更向兒童派發牛奶金，飲完個個強強壯壯，唔使睇咁多醫生，慳番醫療開支，條數計落有着數。你的子弟奀奀瘦瘦唔長高生肉嗎？收起雪櫃內的汽水，給他們喝鮮奶，奶大概是大自然給人類最好的飲料吧，不妨試試。