前日勁跌4成的泛海酒店（292），噚日再跌19.5％至0.70元，成交金額更增至9074萬元，情況認真唔尋常。
不過，佢阿媽泛海集團（129）就喘定，平收0.355元，成交金額1314萬元，似乎有人想趁低收貨。
家陣炒二三線股認真搵命博，買中1隻股價升幾倍，當然笑呵呵，但買完冇耐跌幾成，真係喊得一句句，如果再係咁落去，只會令散戶對二三線股死心。
經紀黃話，就算買二三線股都要搵啲穩陣嘅工業股，例如剛公布今年上半年業績的龍記（255），相對就穩陣得多，而且芬佬評價亦唔差。
龍記上周公布中期業績，盈利有1.24億元，較去年同期1.09億元上升13.7%，兼夾有9仙息派。經紀黃話，鋼材價格自今年初以來已經回軟，所以對製造模具嘅龍記有利。另外，公司致力提升生產力，樂觀嘅預測，係3年內將盈利翻一番。
龍記昨日微升0.92％，收5.50元，但成交好奀，只得50.4萬股，金額277萬元。
慕容小初