前一輪喺君悅酒店日本餐廳食飯，碰到明天更好基金總裁袁金浩，佐治袁呢排好忙，既忙公事，亦忙母校校慶，幾乎變成日本首相左騰右騰。佐治袁畢業於九龍聖芳濟書院，此書院與林超榮之母校荃灣聖方濟書院不同，位於大角嘴詩歌舞街，創校已有五十年，今年十二月就會慶祝金禧校慶，佐治袁負責籌備校慶節目，成日要開會，有乜辦法唔忙。
聖芳濟校友開會，佐治袁多數叫人去皇朝會（DynastyClub），十分高格調。原來皇朝會嘅ＭＤ就係聖芳濟校友MichaelTo，方便晒。十二月三日，聖芳濟要在會展中心設下盛宴，筵開一百五十席，每位收費七百元，到時有乜酒飲，有乜好菜式，眾校友就靠晒阿Michael呢位餐飲老手咯。至於要買餐券，就要搵堅林，即係林堅，已退休之灣仔區總指揮官、前警務處高層，或者搵已退休嘅副校長陳祖雄。左丁山久唔久就在馬場碰到陳副校長，皆因聖芳濟校友養咗一隻馬叫做「濟濟精神」，屬泥地精英，不過已經老退，上季好似未贏過馬，今季不如谷盡一鋪，將近十二月時分，蓄銳一擊，跑番一場泥地，贏完就光榮退役，等啲校友高興吓。
聖芳濟校友之中，養馬最威嘅當然係中信泰富高層范鴻齡，佢年年有馬贏，與朋友夾份嘅「高耀之星」幾乎出親就攞獎金。既然咁威，為慶祝母校金禧，自然有啲表示；學校籌組基金，范鴻齡率先認捐一百萬大元，另一位紙尿片（Fitti）大老闆BrandonWang，可能係擁有最多法拉利?波子嘅香港人車主，佢揸架波子去到德國波子廠，無人不識。Brandon久已定居英國，聽聞母校籌款，喺電話度即刻認捐五十萬。聖芳濟知名校友甚多，如終審庭大法官包致金、資深大律師梁定邦、無綫電視總經理陳志雲、歌神許冠傑、戰神李小龍（未畢業）、盲人之星莊陳有，可謂人才濟濟。