下晝3點過後，期指淡友做嘢，恒指收市散129點，期指散171點。大市成交144億，窩輪成交30.5億元，增4.32億元，佔大市成交額由19.1%增至21.1%。
恒指C輪對P輪嘅成交係1對0.6。唔使講，是日窩輪輸家又係多過贏家好多。恒指收15070，估計喺萬五點可先頂一陣，未必會破。期指低水41點，牌面不利，但股市好多時鍾意反底。
中石化C輪9270：中石化（386）個幾禮拜以來好地地，昨日較差，最低3.40元，收3.425元，跌7.5仙。咁啱，前晚紐約油價續跌，中石化反為對油價下跌作出負面反應。5個幾星期以來，中石化以收市價計從未低過3.40元，估計今回亦會守得住，小注買C輪博反彈。
9270昨跌9%，收24.5仙，明年6月初到期，溢價14.6%，槓桿率14倍（有效6.2倍），引伸波幅29.7%。
高度搏殺格，揀3905，但要留意隻輪剩番9個交易日買賣。9日之後，正股如果跌1格，隻輪冇得剩，正股如果升1毫，隻輪理論價可升4成。炒家自問賭性唔重，咪搞呢隻。隻輪現價0.089元，10月初到期，溢價1.9%，槓桿率38.5倍（有效22.3倍），引伸波幅22.7倍。
章盛