當代大哲人、新儒學宗師牟宗三轉眼間已逝世十年，中、港、台三地先後舉辦《牟宗三哲學學術會議》以作紀念，香港嘅會議上周喺農圃道新亞書院（現改為新亞中學）及新亞研究所內嘅圓亭講室召開。
主辦單位新亞研究所所長陳志誠話俾八方知，牟先生住近新亞校園，上午寫書，下午授課，佢又指住圓亭旁嘅幾個課室話：「先生以前就響呢幾個課室上堂。響香港三十四年間，同新亞關係最深，所以選擇響呢處開會。」八方趁小休時四處參觀，感受一下「舊新亞餘韻」。
當日絕大部份講者係牟師弟子，從佢哋口中，聽到唔少呢位一代儒師嘅治學精神同生活點滴；講室旁邊展出牟先生生活照片，平日所寫、或送給同學嘅墨寶，中大哲學系教授陶國璋回憶說，牟先生曾讚國學大師饒宗頤嘅書法有法度，謙稱自己嘅書法無法度，但佢覺得牟先生書法亦自成一格。
或為唐君毅立全身像
陳教授話，打算響新亞圖書館，闢一個牟宗三紀念室，希望可以俾後人瞻仰一代學人嘅風範，最近有個同學將牟先生送俾唐君毅嘅書櫃由新界送嚟，但至今真迹難求，收藏有限，佢呼籲牟先生嘅學生、朋友讓出其牟先生手稿、生前批閱過嘅書籍及墨寶珍藏或影印本。
另外，中大劉笑敢教授透露，二○○九年係唐君毅及牟宗三兩位當代新儒家代表人物嘅百周年誕辰，中大計劃為唐先生立一個全身像，若最後落實，將係華人大學裏罕有嘅事，因為多數只係半身像。
爆料熱線：29290000、27860099
報料傳真：26239278
報料電郵：[email protected]