余文樂噚日拍新歌《晴天行雷》MV,重租用咗位於摩星嶺嘅前政府物業拍攝。呢個MV用咗成六位數字,又搭病房景,重出動埋水車製造落雨效果。樂仔又拎咗五萬幾蚊,租咗部每秒可以拍成千格菲林嘅攝影機嚟拍落慢雨嘅效果,認真揼本。樂仔笑言成個MV都係靠碌人情卡,好似導演黃精甫同個靚女主角,都係義務幫手嘅。
勤練日文歌
提到最近同韓國天王Rain嘅日本經理人簽約,同Rain做咗師兄弟,樂仔就笑笑口話:「《頭文字D》一上就突然好多人傾約,之前就冇人要我。」佢話預計下年就會主力進攻日本市場,頭炮係下個月十八號參加喺東京同大阪舉行嘅日本音樂節,屆時會唱幾首廣東歌。樂仔話呢排努力練唱《愛情白皮書》主題曲《TrueLove》,因為日本經理人公司想佢快啲學成日語喎!
除咗學日文,樂仔近排重要喺內地拍劇,雖然工作咁忙,不過向來孝順嘅樂仔噚日凌晨兩點都帶媽咪出街,一齊去跑馬地蓮園消夜,兩母子半夜談心,之後樂仔重載埋媽咪番屋企㖭。