曾慶紅嚟香港三日兩夜，煲呔成個月冇覺好瞓，不過，乜都值回票價，大曾猛讚香港有效率，跟住民望又回升，真係「金杯銀杯不如群眾的口碑」啦，下次煲呔見到港大鍾庭耀，一定會情不自禁錫佢面珠兩啖。
嗱，同樣係港大民調，董建華就蝦晒碌，搞到要出路祥安去搞人就唔好啦。你睇煲呔幾掂，賢仔被斬，第一時間企出嚟要捉兇手，又夠膽帶晒六十隻立法會大馬騮去珠三角，呢啲就叫做政治手段啦，學一世都未必學識，都係閃開睇真人騷好過。
好似星期日宴請副主席嗰餐，就安排精妙，特別係主家席名單，煲呔肯定花咗好多腦汁，肥龍同黃灝玄亦幫唔少手。二十四人中（中方唔講），有行政立法司法代表，跟住係人大政協（老董屬於呢組），然後到大紫荊，鍾士元都有請，但係佢因為年紀大冇嚟；鍾逸傑係英國人，以前老董一定避開，但係煲呔冇有怕，重請埋滙豐銀行大班鄭海泉上坐，中銀反而冇份，咁先似一國兩制嘛。
至於馮國經、錢果豐同李國寶又友好又冇威脅，冇乜所謂啦，反正有位；當然有人睇住新地嘅郭炳湘，奇怪佢點解可以坐主家席，如果話佢係政協常委，香港多的是，吳光正比佢更資深，包家同中方關係更深遠，何解吳主席要坐喺旁邊，同陳方安生同枱？
晚晚查字典練普通話
食飯請客係大學問，八方早前講肥龍打過新地工，相信係郭炳湘上坐其中一個原因，吳老闆應該理解。
有同枱食飯者問吳光正係咪真係唔競逐下任特首，吳光正話係，再問佢如果中央要你做呢？吳光正仍然話唔做，真係立場堅定。不過，大家都心中有數，吳光正素來最聽中央話，如果真係叫到，好難拒人千里嘅。
八方問特首辦攞被邀同出席名單睇吓學吓嘢，佢哋好孤寒話冇，梗係啦，呢單大嘢有驚冇險過咗骨，重自尋煩惱咩，反正下集就快上演，不如諗吓長毛到咗廣州，又大叫「平反六四，結束一黨專政」點算重好。
今次大曾訪港畀煲呔幾多分八方唔知，但佢老哥肯定大家樂精神，即係做足一百分，例如用普通話致辭，今次就標準好多，連副主席第三次訪港個「次」字都好準。聽聞佢真係搏命練，唔識重晚晚查字典，唔信問吓曾太。
爆料熱線：29290000、27860099
報料傳真：26239278
報料電郵：[email protected]