窩輪市場靜咗啲，昨日成交金額26.2億元，少過上日近13億元。佔大市總成交嘅比率，由22%跌落19%。
神華C輪登場，有成交者18隻，成交金額2.05億元，佔窩輪成交值8%。正股（1088）早揚晚順，早段9.10元，8.80元埋單，跌0.20元。早段摸頂買C輪者，唔好彩嘅，到收市已經蝕水15-20%。神華C輪，計清楚，普遍買唔落手。
神華C輪9554：9554係最熱門嘅神華C輪，有228球轉手，佔發行量388球好大比例。街貨未有數據，佔比例多少，唔知。隻輪明年12月中到期，輪價20.2仙（早段高價25仙買貨，帳面輸19%），溢價18.3%，槓桿率4.3倍。
計真啲，隻輪有效槓桿率得2.9倍，引伸波幅去到43%，好難買得落手。
神華C輪9579：9579係最長壽神華C輪，下任特首上場都未夠鐘（07年9月到期），輪價23.2仙，溢價40%，槓桿率3.8倍。雖然壽命特長，但畀咁高溢價，換來有效槓桿率得2.3倍，引伸波幅又高達51%，又係好難買得落手。
神華C輪9568：9568數據相對靚少少，買就買呢隻。不過，免得過都咪做嘢。
章盛