代理紛紛擴充，中原地產工商舖部門，喺旺角朗豪坊嘅旗艦店，噚日開張，位於十八樓逾萬七呎。由於中記喺年頭租用，所以租金平啲，十八蚊一呎，三年死約。 九龍舖位部之前租用附近創興廣場，樓層咁啱都係十八樓，但僅七千呎。 既然旗艦店開張，梗要顯吓實力，中記請嚟唔少商舖投資者，好似馬亞木、黎永滔與黎汝遠等，另外同中記熟稔嘅歌星吳國勁都畀面出席。