昨日小初身邊最多朋友講嘅股票，係跌幅之首嘅泛海酒店（292），佢哋周圍問點解隻股跌得咁厲害，係唔係有炒家被斬倉？但最終都係冇人講得出真正原因。
經紀陳就最有慧眼，佢話隻股之前一直都炒過龍，由幾毫子一條氣炒上最高1.94元，市值高到幾乎近百億銀咁滯，遠遠高過阿媽泛海集團（129），當時已傳有炒家部署散緊貨，有此一跌，佢一啲唔覺得出奇。
泛海酒店其實連續跌咗好幾日，噚日再大插39.58％，收0.87元，睇到小初觸目驚心，就算冇乜點升過嘅泛海都受牽連，跌7.78％，收0.355元，成交金額1880萬元。先前泛海酒店股價升，唔見泛海受惠，今次泛海酒店跌，佢又跟住跌，認真莫名其妙。
另外，早排被歐資芬佬減持的福記（1175），近期股價屢創高位，股價靚得交關。經紀黃話，歐資芬佬雖獲利離場，但福記獲得美資大行垂青，主要係睇好大陸送餐市場潛力夠大，仍然有好大增長空間。
福記昨日升3.79％，收8.20元，成交166萬股，金額1354萬元。
慕容小初