講到SONY嘅WEGA，未用過嘅人都知佢係超靚畫質電視嘅代表；SONY最近邀請咗東南亞各地傳媒，教曉我哋另一個生字，就係BRAVIA，佢代表咗SONY第7代超靚畫質嘅LCDTV，畫面解析度由第6代嘅1,500×1,800，大幅跳升至1,870×2,200超高解析度！相對現時市面上夢幻之機SHARPLC-45，都重係行緊1,920×1,080，SONY明顯在LCDTV技術上又有一大進步，預計新BRAVIA系列會在10月中推出，實在令人十分期待！
記者、攝影：許福合
今次SONY喺日本搞嘅記招，陣容都幾勁，除咗香港傳媒，由台灣、泰國、新加坡到澳洲都有，人數過百人，場面好熱鬧，而SONY方面亦由電視巿場部嘅GM菊地寬率領回答記者嘅問題，值得一讚係答案絕對唔馬虎，亦無回避敏感問題，記者們都可以有功課交。
BRAVIA三大系列
今次新推嘅BRAVIALCDTV系列，各位大概都估到BRAVIA係個縮寫，代表「BestResolutionAudioVisualIntegratedArchitecture」，主要強調高解析度嘅表現，而重點就係使用上SONY第7代LCDPanel，自家開發同製造，質素當然更具保證。當中不得不提者，係佢個Panel嘅解析度，由第6代的1,500×1,800，大幅跳升至1,870×2,200超高解析度；講真！第6代嘅解析度已經係夠玩HDTV有餘，今次高上1,870×2,200，真係畫質高到係電影製作級水平！
V系列 顏色特別搶
BRAVIA系列將會包括旗艦級V系列、普及型S系列同大眾化嘅B系列，屏幕吋數由慳地方嘅15吋，到影院級嘅40吋都有，視乎型號而定。SONY咁強調BRAVIA嘅畫質，皆因用上個靚膽，結合數碼處理技術，能應付新一代高解像畫質嘅要求，而旗艦級V系列更具備WCG-CCFL（寬色度）技術，能提高畫面色域，尤其係紅同綠色，能提供多30%顏色深度，畫面比較之下會較鮮豔，更似LiveColor！
以頂級V系列為例，淨睇規格就已經高人一等，對比度高達1,300：1，一般LCDTV只去到850：1左右，而光度更有500cd/m2，超高8ms反應時間及近乎全視覺嘅178度可視角度，而現時標準實在無咩好挑剔，加上一系列人性化設計，如V及S系列具備光度感應器，能自動偵查環境嘅光度，從而調節亮度同畫質，睇落唔怕刺眼同舒服得多。V系列更多個畫中畫功能，可以同時睇2個台，咁就唔使爭住睇電視！
解構V、S、B系列
BRAVIA的V、S系列，看規格好似很接近，不過大家留意S系列是少了HDMI輸入，未能對應將來的HD廣播，而且亦未能對應一些高階影音產品，感覺一如以往SONY賣芒的策略，相同吋數有高、低階型號之分，不過講實用性，當然以V系列佔優；至於B系列，以它的低吋數，好似想走小影院路線，加上4:3的畫面比例，更明顯是俾大家放入房睇DVD之用，由此可見BRAVIA要盡佔AV市場不同層面的野心。
最先進LCDTV廠房
BRAVIA係由日本位於名古屋嘅InazawaTEC廠房製造，由69年12月1日投產，僱用員工多達1,350名，主要負責製造LCDTV，所出品產品會運送到日本、亞太區、歐洲等地區發售，而最新嘅BRAVIA系列亦由這裏製造，現時大約每星期可製造35,000個LCDTV。
BRAVIA靚畫質Show畀你睇
除咗睇產品，記招亦詳細介紹同示範所使用嘅技術，對BRAVIA能有更深入了解。
顏色比拼
呢個示範係用來睇Panel所能出到嘅顏色，右邊嘅BRAVIA明顯更紅及鮮豔。
寬色度講解
色域圖可能好多用家都見慣見熟，用來講解BRAVIA如何顯示更多顏色就最啱！
HD播片
播放HD影片都係BRAVIA強項，用HDDV機拍嘅畫面，真係可以用纖毫畢現嚟形容。
Blu-Ray試片
要玩盡BRAVIA，DVD碟都未夠班，所以同場亦示範Blu-Ray嘅應用，亦有新機BDZ-S77展出。
接駁電腦
想慳地方，將BRAVIA當埋電腦芒使用當然係最佳方法，解析度夠高，畫面唔錯。
睇高解像相片
BRAVIA解析度高，當睇番由高解像DC所拍相片時，效果相當理想！
同場加映：70吋QUALIA電視
QUALIA系列，可謂SONY嘅貴族級產品，兼有省招牌的作用，今次筆者亦喺台場嘅SONYShop，就睇到部QUALIA006嘅70吋超大LCDTV，具備SXRD技術，畫面好Sharp好靚，連黑位都好有層次感。據知QUALIALCDTV是使用了獨立生產線，而且同樣位於InazawaTEC廠房內，筆者參觀時亦見到唔少QUALIALCDTV。繼承QUALIA嘅傳統，006都定出個天價1,680,000日圓（約118,884港元）！
