大曾旋風一過，特區政府又回復正常運作。行會今日放完暑假復會，八方聽聞，啲議程多籮籮，西九、政改同施政報告等等排住上，條長龍同「飛越太空山」門口有得揮。
行會傾乜要保密，所以煲呔位新聞主任細當奴乜都話無可奉告，但係大家都估到啦，曾副主席剛剛訓完話，睇怕煲呔都要帶頭消化吓中央精神。肥龍無論認唔認都好，肯定有同喬曉陽傾過吓，皆因政改第五號報告想下個月出台，時間無多，如果喬老爺准佢加晒啲議席畀區議會，掩住左佬把口，你話幾發呢。
至於西九，唔要天幕同成立個管理局勢在必行，急就未必有政改咁急，但係肥龍話過有嘢報告，都要交代吓幾時提交法例草案，人哋立法會議員都喺梁家傑帶領下準備去考察，政府睇嚟都要出嚟講吓嘢，交代清楚。
爆料熱線：29290000、27860099
報料傳真：26239278
報料電郵：[email protected]