張崇基與張崇德兩兄弟前晚在紅館舉行演唱會，弟弟崇德憶述與劉美娟的愛兒僅出生一天便夭折，在獻唱寫給兒子張天藍的歌曲時泣不成聲，其兄崇基與台下的家人也難過地同聲一哭，場面悲傷。
張崇基與張崇德兩兄弟前晚在紅館舉行一場《基會難德演唱會2005》，入座率九成，二人合唱了五十多首歌，當中包括大熱K歌，廣東及國語金曲，亦有教會歌曲、粵曲等。向海嵐、譚小環、蔡一智、蘇永康、梁漢文及張氏兄弟的家人都有捧場。
澄清太太身份
張氏兄弟在台上施展渾身解數，大跳勁舞、打鼓及吹色士風，而張崇德太太劉美娟上台獻唱時，張崇德特地澄清他不是哥哥崇基的太太，崇德笑說：「如果有人重未知佢係我太太，千祈唔好搞錯係崇基嘅，佢係崇德太太先真。」而劉美娟在獻唱後有感而發道：「我今晚心情好興奮，大家知呢段時間我經歷咗好多嘢，好彩有你哋錫我，關心我，重有我信任嘅神。」
後來張氏兄弟又大跳勁舞，哥哥崇基則騷肌肉，大露背的崇德露底褲邊，崇德說：「買唔到阿RAIN演唱會飛嘅，可以再買我哋加場。」崇基則謂：「我重想入手術室割雙眼皮，點知𠵱家竟然流行單眼皮。」
及後崇德在台上傷感地憶及他與劉美娟的愛子出生一天就夭折的事，他說：「今年二月我行咗好難行嘅路，幫我個仔寫咗首歌，叫《再見天藍》，我個仔叫張天藍。」說到此時崇德已哭得失聲，台下的婆婆及家人也難過地流淚。
深信天再放晴
哥哥崇基也哭着搭弟弟肩膊，遞上毛巾說：「呢段時間我問過點解呢啲事要發生喺我屋企，反過嚟要崇德同美娟安慰我同家人，我知所有嘢會過去，我深信神會喺我哋身邊。」
事後慶功宴上，崇德提到在演唱會上想起兒子失控狂哭，他說：「我哋年幾前構思開演唱會嘅時候，已經知BB會出世，預計開騷嗰陣，佢七個月大，當時重諗帶唔帶佢嚟，諗住放佢喺後台，但今日突然覺得乜都唔同晒。」
採訪：馬建華 攝影：何國豪
