【本報訊】「長毛」梁國雄前天在特區政府晚宴上，當着一眾達官貴人高喊「平反六四」等口號，但卻巧妙地選擇在特首曾蔭權發言時出擊，提早被逐離場，免卻打斷國家副主席曾慶紅發言，其「識做」表現獲本地左派及不少市民讚賞，相反民主派內部卻有不同意見，民主黨主席李永達堅稱晚宴時不宜高喊口號，其他民主派亦未有聲援長毛。有學者認為，泛民主派「分而不裂」的合作方向會愈趨明顯。 記者：許偉賢
立法會議員梁國雄前晚近乎「妥協」的表現，在親政府陣營引來不少迴響，有港區人大代表私下讚長毛表現「好到不得了」，「佢講啲嘢明明係針對曾慶紅，但就等曾蔭權講嘢時嗌，結果一開始就要同大家講拜拜，簡直係用最低武力達到目的，相信中央都睇得好清楚。」
長毛否認是妥協
中聯辦副主任李剛及港區人大代表吳康民昨被問到長毛表現時，亦沒有開腔狂轟，只有言論激烈的全國人大常委曾憲梓形容長毛的口號是噪音，破壞和諧氣氛，反映長毛今次未算惹來中方極度不滿。
長毛昨在電台節目中稱，擔心再遲一點會被逐離場，連叫喊口號的機會也沒有，故選擇在曾蔭權發言時叫喊。他否認此舉是「妥協」，他強調「我想佢（曾慶紅）聽到啫；揀呢個時機，就一定做到，唔係話一定要同佢有對話。」他更稱，稍後要到愛爾蘭考察，最後未必會隨曾蔭權率領的全體立法會議員訪問珠三角。
不少市民昨致電電台節目力撐長毛做法得體，聽眾張先生說：「長毛揀呢個時間好啱；喺曾蔭權講嘢時嗌，重可以嗌晒全句；到曾慶紅時嗌，可能起身𢱑吓頭髮就俾人攆走。」黃女士亦稱：「我都好欣賞長毛呢個升咗層次嘅做法。」
民主派對長毛此舉則未給予百分百支持，民主黨主席李永達在電台節目中稱，據內部調查顯示，市民普遍支持民主黨做法，直指「我哋唔覺得喺一個宴會中要叫口號；我哋堅持坐低對話係好過叫口號」。他稱向曾慶紅遞交立場書，亦可表達對平反六四的看法，毋須透過口號達致目的。
學者：分而不裂
45條關注組立法會議員梁家傑指，政治人物會自行判斷其政治行為，個人不欲作出評論。
有聽眾則在電台節目炮轟其他民主派成員未向長毛施予援手，聽眾謝生直斥：「當時二十四位偽民主派只喺度食飯；呢啲係香港人應該做嘅，但佢哋全部冇出聲，又冇幫拖，佢哋講就天下無敵，做就無能為力。」
另一位聽眾李小姐怒指「出年（下屆）唔投佢哋（民主派），投畀長毛。」
城市大學公共及社會行政學系教授張炳良分析，民主派人士「各自修行」實屬正常，認為民主派未有與長毛站在同一陣線，「唔等於大家唔互相支持」。但他承認，民主派內的不同走向會愈趨明顯，直指「唔可以要求佢哋每一步都一齊行，相信佢哋日後都會係分而不裂」。