講起潮州菜，中貿Ｋ話以前北京有著名本港菜館，生意好到冇得頂，日夜爆棚，賺到笑，但幾年之間就結業。原因何在，中貿Ｋ話有兩個主要原因：第一係好多原材料由香港空運到北京，成本貴；第二，最初用好多「港職」（香港職員），計香港薪水，薪金貴。兩樣加埋，北京潮州菜館自然要收香港價錢，另加北京內地特有嘅經營費用，所以餐價比香港高出三四成。
咁貴都其門如市，就引起咗注意。港商在此請客，以示誠意，客人自不然係各級官員。你知啦，到京方知官階細，京師內高官雲集，請少個都唔得。中貿Ｋ話：「後來有人在門口抄車牌，認司機，查吓邊啲官員受邀到呢間潮州菜館食飯。消息傳出後，官員唔敢去，港商、民企、駐京辦惟有到其他地方請客，呢間香港人開辦嘅潮州菜館嘅生意如江河日下，惟有關門。」
所以話，在國內做生意，最好悶聲發大財，唔好過份高調。中貿Ｋ知道內地名食肆食水甚深，每位司機送老闆到臨，司機收紅包一封，另外十個八個司機坐埋食一圍，老細喺貴賓房食，司機在堂座食，司機筆費用係代支，又入埋會鈔嗰位仁兄條數。中貿Ｋ有幾次請一圍食飯，埋單畀夠一圍幾（司機們當然未必食足老細級菜式），為之牙痛咁聲。
最近中貿Ｋ與老闆到深圳，請一位大客食日本菜，呢間深圳日本料理名聲甚響，中貿Ｋ一行三人食松坂牛肉鐵板燒，埋單四千幾港紙，嚇咗一驚。價錢高固然令佢肉痛，最慘嘅就係呢間深圳名店嘅松坂牛肉燒出嚟，曳過中貿Ｋ自己喺屋企整Angusbeef。三個人在深圳食四千幾銀，福建Ｆ話：「不如你請我去Nishimura，食到你讚口不絕，最多我請你飲極品純米大吟釀！」左丁山聽到口水流，話明如果有局，一定要預我一份。