今日同大家講一個字——就係個「心」字，點解咁多嘢唔講要講心？之唔係國家副主席曾慶紅威勢難擋，八方都要跟紅頂白，學習吓領導人講話嘅精神。
話說大曾前晚喺郭家間大酒店開party，食飯之前，召見特區領導班子，面授機宜。經過去年喺馬交胡主席嗰鑊之後，班高官對於呢亭會面都心情忐忑，擔心「查找不足」完重「仍有不足」。好彩，大曾仁慈過白雪公主，唔止冇疾言厲色，重同細曾以及佢班馬（當然有部份唔認係曾馬房）講「心」。
「八年風雨」婉轉得多
中央今次破晒格搵港英餘孽接棒，可謂大膽之極，大曾對住以煲呔為首嘅特區班子，話佢哋對香港好關心，但見到特區回歸「八年風雨」（呢句就比細曾嘅「七年惶恐」婉轉得多啦），開始憂心，有啲時候重揪心㖭，好彩𠵱家「在變化在進步」，所以比較放心，如果你班友仔生生性性，更加努力搞好香港，中央就會開心啦。
由關心到憂心到揪心到放心到希望有得開心，心連心五心齊發，細曾同班高官就算唔心有戚戚然，睇怕都唔敢心不在焉囉，若然繼續勾心鬥角、口和心不和，就真係辜負副主席一片苦心。
你話係咪好似阿媽教仔一樣，真係骨頭連着筋，想鬧又唔敢鬧，想打又唔敢打，但又恨鐵不成鋼。其實八方都覺得大曾幾辛苦，如果唔係要緊守一國兩制、港人治港，高度自治嘅承諾，聽日就派人落嚟搞掂你班友，使乜做咁多戲，又派糖派禮物𠱁你班番書仔女，幫你剪完綵臨走重低聲下氣到公開話「香港好，國家就好」，其實個心嗰句可能係中央夠晒多嘢煩，保你大，咪搞喎檔攤啦！
搞到阿爺死心就大鑊
所以話，香港人真係身在福中不知福，去迪士尼喪玩之餘，應該要北望叩頭謝恩；咪有朝一日共產黨頂你班人唔順，畀晒啲CEPA、自由行、QDII你哋，仍然日日嘈喧巴閉，請埋你飲重要叫口號，到時阿爺不但只唔開心，重會傷心、灰心甚至死心。咁就大鑊，因為共產黨狠起心同冇良心起嚟非常可怕，連個天都怕咗佢，雨都唔敢落㗎。所以大家都係合作啲好，至低限度喺中央領導面前要扮和諧和睦，全力唱好，盡心擦鞋囉。
爆料熱線：29290000、27860099
報料傳真：26239278
報料電郵：[email protected]