大市繼續在窄幅內上落，恒指高低只相差54點，上晝市有接近兩個鐘頭，恒指就只在10點內上落，大部份股票的買賣價都冇變動，水淨鵝飛，恒指收15199，升34點，成交就縮到只得137億元。期指收15200，高水1點。
呢個月好多大藍籌嘅C輪到期，發行商為要食到盡，肯定會出盡法寶，㩒實相關嘅股票，所以，大市重會有一段長時間在窄幅上落。呢輪有多隻滙控輪到期，滙控（005）嘅表現就一如所料，易跌難升，即使外圍造價127元以上，亦冇用。
早一輪提過，可能會有動作嘅吉林化工（368）同中油（香港）（135），噚日上演一齣雙翼齊飛，吉化高收2.425元，升8.9%；中油收1.75元，升4.1%。吉化呢輪個勢真係好強，7月底推介時股價1.87元，短短個半月，升幅已接近3成。
睇走勢，吉化由今年3月底開始，形成一個大圓底嘅收集形態，噚日一舉而升破頂部阻力，且有3500多萬股的大成交支持，照度上去，短期上升目標指向3.25元。
長期呈強惹憧憬
睇好吉化，業績唔係考慮因素，但股價長期呈強，必然有因，原因只有兩個，唔係母公司注資，就係私有化，個人就認為私有化機會最大。
又睇吓吉化盤數，05年（12月年結）上半年，營業額180億元人民幣，獲利1.29億元人民幣，下跌79%，主要係成品油價格上升未能抵銷原油成本升幅，而吉化亦再發盈警，今年首3季利潤同比料會跌逾50%。
中石油（857）係吉化嘅大股東，持有67.3%權益。吉化經營艱苦，其實大股東已好照顧，為供應較廉價原油同低成本融資作出補貼，兩間公司有好多關聯交易，由05年至07年的3年內，關聯交易高達1894億元人民幣，平均每年成600億元。併購係行業大趨勢，中石油同吉化幾乎係兩位一體，私有化絕不令人意外。
講番中油，暫時重係造緊個上升三角形，但噚日已一舉而升破10日（1.72元）同20日線（1.706元），似有向上突破之勢，三角形上升阻力係1.82元，一升破，上升目標指向2.30元。中油係中石油的兄弟公司，公司會否有大動作，同樣引人憧憬。
郭兆誠