滙豐係公益金捐款最多嘅慈善機構，噚日佢哋又有新捐款活動，就係贊助路向四肢傷殘人士協會活動中心嘅裝修費用，捐咗一百六十萬蚊。香港滙豐銀行主席鄭海泉重喺中午親自出席，帶同老婆一齊主持新中心開幕禮，周一嶽梗係多得佢唔少。
開幕禮上鄭大班被問及去曾慶紅副主席晚宴時，打算同曾副主席傾乜嘢，佢話咁嘅場面相信冇乜機會同副主席傾偈，只可以離遠睇吓佢嘅風采喎！不過據八方噚日喺晚宴所見，鄭大班係坐主家席，佢實在太過謙虛呢。
講番滙豐贊助嘅傷殘中心，新中心位於將軍澳調景嶺，佔地三千呎，而該協會會員人數達五百人，中心除咗為四肢傷殘人士提供支援外，會員又會到學校同醫院講解生命意義，回饋社會。
傳真︰2623-9278
電郵︰[email protected]