打開機嘅人，對於《逆轉裁判》系列應該唔會陌生，過往喺不同平台都推出過好幾部作品，今次轉戰NDS，推出全新作品《逆轉裁判：復甦逆轉》，唔單止加入咗全新嘅故事內容，連玩法都因為加入咗NDS嘅獨特機能，而變得更有趣，好似扮警察，用TouchScreen掃指模、對住個咪嗌Objection（反對），法官會馬上停下審訊聽你講乜，《逆》再一次表現出NDS嘅無限創意！不過奉勸大家千祈唔好周街玩，途人見你對住部機又嗌又吹，可能會當你儍㗎！
記者：梁瑋瑜
NDS遊戲大多數先出日版，後出美版，唔識日文嘅玩家一係等多一頭半個月，一係上網搵攻略玩日文Game，今次《逆轉裁判：復甦逆轉》竟然喺一個遊戲裏面，有齊日文同英文字幕顯示選擇，實屬罕見；使用方法好簡單，只要喺主菜單裏面選擇「英語」，成個遊戲就會用英文進行，對於呢隻以查案為主題嘅遊戲，玩家真係方便好多；大家再唔使靠睇埋晒啲「二手」攻略，又唔使等美版推出，靠住自己嘅智慧就可以火速破案，真係好吸引！
逆轉冤案 靠逆轉裁判
玩家飾演24歲嘅新任律師成步堂龍一，遊戲裏面有五個故事，其中四個都喺前作出現過、不過全部都係尚未解開嘅謎團，最後一個故事就係全新嘅，而所謂「逆轉裁判」，其實就係成步堂透過徹底調查案件，令一啲被冤枉嘅被告人，得以沉冤得雪，肩負起呢個重任嘅你，當然要眉精眼企啦！遊戲裏面五件案件都係兇殺案，而且都係有目擊證人，不過喺調查過程裏面，大家就會搵出究竟邊個先至係真正兇手，呢個解謎過程真係好過癮！
TouchScreen掃指模
遊戲進行嘅地方分別係案發現場同埋法庭裏面，喺案發現場，玩家要利用吓屏幕仔細咁搜集證據；利用輕觸式屏幕，玩家可以自由咁拎起任何物件嚟調查，相比以前嘅GBA版，真實感強好多。此外，玩家亦可以利用其他工具幫你，好似可以睇到隱藏血迹嘅特製眼鏡，戴咗佢會睇到好多肉眼睇唔到嘅嘢，呢個系統重可以仔細到計算到血痕嘅量，同埋喺地圖裏面記低血迹位置等，好厲害㗎！
另一個好玩嘅地方係進行指紋認證，玩家需要用支輕觸筆喺案發現場掃上指模粉，再對住個咪輕輕一吹，指紋就會好清楚咁出現，之後玩家就要將指紋同疑犯進行比對，從而解開謎團！小記試玩感覺超真實，玩法諗得細心，又能用盡NDS嘅功能，絕對抵讚！
上法庭 對法官嗌Objection!
案發現場咁好玩，唔好以為去到法庭就會好悶呀。嚟到法庭，身為律師嘅成步堂當然要呈上各樣證物同證供畀法官睇啦！去到某啲部份，就需要跟住遊戲指示對住個咪大嗌，好似「Objection!」、「Wait!」等等，如果揀日文版當然係用番日文啦，玩起上嚟真係搞到自己好似變咗律師咁，呢個玩法真係好正！
今次《逆轉裁判 復甦逆轉》重有一個限量版BoxSet，裏面有漫畫、設定圖集、SoundTrackCD、手指形輕觸筆同埋電話繩等，咁豐富嘅內容，都只係賣$418，實在好抵，要買就要快手喇！
Profile
機種：NDS
類型：偵探遊戲
人數：1
售價：$299/$418（限量版BoxSet）
CAPCOM（23661001）
