太陽帽？有。太陽遮？有。蚊怕膏？有。今日9月12日，準備起行去迪士尼。重有咩冇帶呢？死火！報道話樂園餐廳座位不足、選擇又不多，咁肚餓點算？又話唔畀帶嘢入去食，今晚睇完煙花就走人，唔想餓嚫?!不如近近哋去東涌就有幾間出色餐廳同酒家，打個電話，重有專車接送㖭。
記者：梁學文
攝影：伍慶泉
Models：Keisha、Winnie、Jerry（TheGroup）
東昇樓專車接送10分鐘就到
打個電話再等一陣，就會有Benz專車喺迪士尼門口接你去東昇樓食飯。這裏位處馬灣涌村之中，是由村屋改建而成鄉村酒家，別有一種鄉村風味。酒家內的裝潢甚有70年代Feel，木門、階磚地板、吊扇等，讓你享受美食之餘，亦可以感受一下懷舊的感覺。
因為鄰近東涌灣，所以東昇樓最出名的就是海鮮類的菜式。東涌灣位於鹹淡水交界，海產豐富不在話下，加上海水未受污染，海產自然新鮮。這兒每日由原居民出海捉魚，然後提供酒家烹調。試過後，誰還敢說香港人無好魚食？東涌蟹和東涌蜆是這裏特有的海產，來到這裏不可不試。另外，每日出爐的炭燒豬腩肉亦屬必試之選。這裏的菜式都保留傳統的做法，而且不落味精。每枱客人均送例湯，每煲都落足料，非常夠味。
椒鹽瀨尿蝦$168/斤
做法與一般的椒鹽炒無異，不過就用上印尼空運的瀨尿蝦王，大大隻啖啖肉。瀨尿蝦王差不多有成呎長，可以切開食，不過原隻剝殼食就滋味得多。師傅先爆香椒鹽同蒜茸，之後炒瀨尿蝦，連蝦殼都咁夠味。大大隻瀨尿蝦入口爽口彈牙，有椒鹽味之餘亦不失蝦本身的鮮甜，味道一流。
豉椒炒東涌蜆$45/例
不要小覷這碟$45的例牌炒蜆，成碟蜆都有成斤半重，好夠份量。每隻東涌蜆都好大隻，蜆肉入面保證無沙，非常乾淨。東涌蜆比一般的蜆鮮甜好味，不加調味料淨用缽仔焗，已經好鮮甜。用豉椒炒，就更加惹味。蜆肉又大又甜又多汁，只售$45，重可以喺邊度搵？
清蒸黃腳鱲$9/両
這裏的鱲魚全部來自水質好的東涌灣，魚肉特別鮮甜好味。魚肉入口嫩滑，清蒸食夠晒原汁原味。你亦可以選擇其他煮法，不過清蒸就能將魚的鮮味完全突顯。除了黃腳鱲之外，黑鱲同樣好味。
炭燒豬腩仔$40/例
燒腩仔是這裏的必食之選，幾乎每枱客人都會點。燒腩仔每日出爐兩次，早午各一，要食到新鮮燒好的燒肉，就要校啱時間。這裏的燒腩仔，打從開舖到現在有33年歷史，經驗豐富。燒腩仔入口炭燒味濃，外皮脆肉質嫩滑，肥瘦相間好有口感。食時不妨試吓加一粒蕎頭，點些少芥辣，保證別有一番風味。
紅燒元蹄$88
元蹄燉足五個小時入味之外，肉質亦燜腍。這裏的做法跟外面不同，一來他們不會用南乳，二來用上秘製香料，味道較清香。配上爽口清甜的小唐菜，令賣相更吸引。紅燒元蹄足一斤，真係抵到爆！
食客有Say
陳先生：「燒肉外皮好脆，好香口。」
東昇樓海鮮酒家（29881494）
東涌馬灣涌村94號
座位：約300人
營業時間：6:00am-11:00pm
交通：免費專車接載往來東涌地鐵站（東涌區內接送無最低消費），由迪士尼樂園往來東昇樓（最低消費$500）；亦可在東涌地鐵站乘搭E31至逸東邨，再步行五分鐘至馬灣涌村。
美樂軒村屋泰菜
除了有海鮮食之外，位於下嶺皮村的美樂軒就提供特色泰國菜。美樂軒同樣是由村屋改建，樓高兩層，樓下有露天茶座。入夜之後不少機師空姐會在這裏聚腳，貪佢環境好、價錢平。這裏由正宗泰國師傅禮哥坐鎮，手勢正宗又傳統。
香辣牛柳$48
外形同味道有點似中式牛柳，同樣甜甜哋。不過就多了一份泰式香料味，亦帶點辣。牛柳入口鮮嫩，裏面軟綿綿，口感不錯，賣相亦靚。
香茅胡椒炒蟹$128
師傅選用膏多肉嫩的膏蟹，炒香之後好惹味。師傅先爆香香茅和薑等材料，然後加入胡椒炒蟹，再加入炒香了的香茅絲，增加香味。香茅絲入口好香口，味道清新。飲住啤酒歎炒蟹，簡直襯絕。
食客有Say
林小姐：「我鍾意食呢度嘅炒飯，飯粒好爽口。」
美樂軒（29888129）
東涌下嶺皮村10號-15號地下
座位：100-150個
營業時間：10:30am-2:30pm，6:00pm-11:00pm
交通：機場及區內免費專車接送
東涌獨市甜品
這裏可以算是東涌唯一一家甜品店，雖然沒有專車接載，不過幾乎每架由東涌往大嶼山的巴士都路經此地，交通亦算得上方便。這裏主打健康鮮果甜品，適合追求健康的人。你去完迪士尼都唔會早，趕尾班車返到港島區，食店又可能關了門，不如去東涌食少少嘢先「返扯」啦！
甜品朱朱（29881323）
東涌上嶺皮村9A
座位：約80個
營業時間：12:00pm-12:00mn
