騷time一到，曾慶紅噚日馬不停蹄，港九新界四圍走，出盡渾身解數大打親民公關牌。雖然佢年紀稍大，記性唔多好，廣東話又難學，但一個喺中國共產黨大嘅人，要搞統戰絕對難唔到佢嘅。
親民騷係例牌菜，八方等咗佢成日，只係想聽吓大曾喺港島香格里拉篇重要發言，有冇驚喜。點知聽咗十幾廿分鐘，全部都係和睦同和諧，好似讀幼兒班咁，老師不停叫啲同學仔唔好打交，唔好大蝦細，要互愛互讓；之外就係穩定繁榮，抓緊機遇，一吓子又好似升咗做大學生、上工商管理課，一味向錢看。難怪有高人一早指點，香港只可以講經濟、講金融、講搵錢，其他政治課題如民主自由一概免問。
大曾擺明車馬，小曾當然心領神會，喺台上毫無懼色咁以鹹淡普通話擦鞋，重唔怕肉麻引述大曾金句乜嘢「金獎銀獎不如群眾的誇獎，金杯（普通話音同碑）銀杯不如群眾的口碑」，聽得八方毛管全部豎直，你引孔夫子《論語》「和而不同」就算啦，使唔使背「語錄」呀，𠵱家大陸都唔興呢家嘢。
李家郭家威晒
今次大曾南來，安排都好周全，例如佢住喺李嘉誠嘅海逸酒店，晚宴就喺郭鶴年嘅港島香格里拉，下晝又登上郭家三兄弟同李兆基嘅國金二期，你話係咪雨露均沾呢；重有，大曾喺酒店見過超人兩仔爺之後，噚晚就安排小曾助選團長李國寶同肥龍舊老細郭炳湘坐主家席，真係畀足特區新領導面，吳光正田北俊唔知坐咗去邊，都唔恨得咁多啦。
肥龍又真係有影響力㗎，君不見，大曾見嘅人同佢都有關，好似當年嘅打鱷英雄三人組（曾許任）全部亮相，話就話佢同金管局任總冇咗以前咁好傾，但始終係戰友，而且特區講經濟，任總好重要，搶嘢都靠佢搶。另外，大曾去馬場，跑馬愈跑愈歡，亦係畀面肥龍個老死夏佳理啦，有領導人一句話，入行會冇得阻啦。
咁最冇癮嘅，唔使問都係董建華，可憐佢重要笑面迎人坐喺廖暉身邊，而唐唐就因為要去食迪士尼晚宴，無緣與副主席同枱食飯，煲呔勁敵一掃而空。
傳真︰2623-9278
電郵︰[email protected]