全城陶醉於米奇米妮的歡樂氣氛裏，但不少人對迪士尼的霸道作風其實極看不過眼，誓抗衡迪士尼鋪天蓋地的宣傳攻勢。一曲《他約我去迪士尼》風靡萬千迪士尼迷；反迪士尼者近日也在網上發放新曲《奇妙世界》，唱盡迪士尼自以為是、虛假霸道的面貌。
樂園自大以為救港
「奇妙世界，花錢都買……從卡通到水杯、着拖鞋看新聞、細蚊仔學英文，你全面照料。」哼着反迪士尼兒歌《奇妙世界》，社運樂團「噪音合作社」歌手孔繁強說：「首歌想反映迪士尼嘅霸權心態，普通人難以抗拒。」他近日將歌曲上載互聯網，希望吸引更多人關注迪士尼問題。
「迪士尼成日話提供奇妙旅程，最奇妙就係港府出九成錢，但只係得一半股份。」孔繁強並不憎恨米奇米妮，但對迪士尼的霸權心態反感。「搵小朋友做義工宣傳重諸多限制；三萬人迫爆樂園又話係故意，人哋畀錢入去玩㗎，點可以當客人係白老鼠？唔該迪士尼唔好咁自大啦，成日以為自己救咗香港，其實係嚟攞我哋着數至真。」
圖書工人時薪兩元
「迪士尼樂園出賣嘅係歡樂同美好世界，但同時製造咗唔少污染、工傷同剝削。」剛大學畢業的楊文友形容，迪士尼是間「出賣夢想」的工廠，「畀錢入樂園不過係麻醉自己，返出嚟咪一樣要面對唔開心嘅嘢。」
至於自小喜愛米奇的丘梓蕙，對迪士尼了解愈多就愈是失望。「大陸做迪士尼圖書嘅工人，時薪只得兩蚊，消費者買得咁開心，有冇諗過係剝削緊工人？」
迪士尼卡通不現實
「細個好鍾意睇唐老鴨，但人愈大愈覺佢迪士尼卡通唔現實，於是轉睇日本卡通。」樹仁學院一年級學生劉子健，對迪士尼的奇幻世界不屑一顧。
迪士尼樂園昨日會舉行城堡音樂會，名人明星都會到場，但他寧參加由獵奇行動主辦、在樂園門外舉行的民間晚會。「我覺得樂園係屬於全港市民，唔應該有錢先有得入去尋開心。」
記者：雷子樂
