中科環保（351）傳中電國際入股已有一段頗長時間，一班捧場客等到頸都長埋，上周終於宣告落實，今次雖然涉及嘅股份唔算多，計落只係5％左右，但總算令中科環保沾到光。
經紀陳話，中科環保會以相同價格配售6500萬股出街，據講貨源同樣唔係通街派，而係落入強者之手，所以隻股今日復牌有得炒，相信股價會有好表現。
本周陸續有公司公布業績，其中賭王一系，何氏姐弟打理嘅新濠國際（200）同信德集團（242）分別於今明兩日公布業績。經紀黃話，雖然新濠近期股價走勢相當靚，但佢就鍾情於家姐主政的信德，貪隻股呢排冇乜點升過。
經紀黃話，綜合多間證券行估計，信德今次公布嘅中期業績，盈利可能會倒退，原因係期內冇乜賣樓收益提供。
不過，家陣行緊新會計制度，相信會有啲重估投資物業升值之類嘅帳面利潤頂住。但分析員仍然睇好信德，係因為明年喺澳門開始有樓賣，毛利率重係好高，所以短中線有得諗。
慕容小初