保險行尊Ｋ叔請食午飯，席設灣仔一間潮州酒樓，呢間酒樓要在大廈一樓坐電梯再上，一樓原來係客家菜飯店，左丁山摸錯門口，兜兜轉轉，搞咗五分鐘先至摸到上去，只見全場爆滿，座無虛席，如果晚市都係咁好生意，呢間潮州酒樓就發咯，但一位老友話：「呢度晚上隨時有位。」
坐落之後，飲一碗煲足八小時之響螺煲雞腳湯，滋味在雞腳，可惜左丁山唔慣食雞腳，錯過晒。睇見雞腳，退休賓架Ｌ有嘢講：「上次我哋去豪宅會所食佛跳牆，居然內有雞腳出現，豈有此理。」Ｋ叔附和：「呢間豪宅會所嘅佛跳牆唔入流，同以前尖沙嘴金冠酒樓嘅佛跳牆相比，差天共地。」福建Ｆ立即反駁：「唔係吖，你哋食慣咗廣東化嘅佛跳牆啫，正宗佛跳牆邊度會有鮑參翅肚㗎……」前輩Ｙ話：「喂，我哋喺金冠食佛跳牆嗰陣時，你重係華仁仔，讀緊小學咋。」
賓架Ｎ亦係福建人，打圓場咁話：「話分兩頭，香港式佛跳牆係豪華改良型，我哋福建窮鄉，邊度會有鮑魚魚翅㗎，燉佛跳牆嘅正宗原始材料係雞腳、魚肚、鱆魚、排骨……」退休賓架Ｌ講：「我接受你解釋，但係豪宅會所收費唔合理，有雞腳嘅福建式佛跳牆餐，使唔使收到頂尖價錢呀？」
為咗佛跳牆，拗咗一餐，好彩呢班老友已經拗足三十年，點拗頸都不傷和氣。Ｋ叔話：「嗱，食完飯返出去，唔使行樓梯，下邊有條天橋直通隔籬一間酒店一樓，甚為清靜，唔怕有人睇到，㩒𨋢就可上房休息吓。」眾人大笑，咸稱方便。又有咁啱嘅？賓架Ｃ即時起身話趕返銀行，醫生Ｌ跟住話開會走先，連到最得閒嘅外滙專家都話有要事先行，賓架Ｗ大聲嗌：「真係去酒店小休片刻呀？」呢條橋又幾好噃，嚟呢度食完飯，走入酒店房，正是午間有路數，老婆要知道。