國家副主席曾慶紅做大騷，為免令大曾不愉快，小曾曾蔭權都要親自出馬，擺平各種不滿聲音，「的士小巴權益關注大聯盟」為抗議運輸署禁止小巴行駛青馬大橋載客到迪士尼，打算示威，聯盟話事人黎銘洪透露，幾個月前支持煲呔參選，煲呔當選後，更去信道賀，但一直無回音，上個月佢公開話要趁曾慶紅訪港時示威後，隨即收到特首辦回信，煲呔多謝佢之餘重加多張感謝狀，黎銘洪話最特別嘅，係煲呔提醒佢要締造和諧社會，似乎想暗示叫佢唔好搞對抗。
黎銘洪話煲呔嘅好意心領，但業界搵食要緊，今日照樣會派出四架小巴到迪士尼，但就會掛住熱烈歡迎曾慶紅副主席訪港嘅橫額，費事畀人話佢哋針對國家領導人啦。
至於聲言今日會召集二百人帶埋豬隻到迪士尼外示威，申訴本地養豬業十多年嚟畀政府漠視苦況嘅香港養豬業發展協會，日前經政務司司長許仕仁斡旋後，終於決定取消行動。煲呔出手未竟全功，估唔到又畀肥龍威多次。
傳真︰2623-9278
電郵︰[email protected]