大市上上落落,一啲炒家費事揀個別輪炒,向恒指輪埋手。上周五,成交金額最大嘅輪,清一色由恒指輪包辦,有C有P。
上周五,港股總成交168.7億元,窩輪佔37億元,佔總成交21%。恒指C輪與P輪總成交金額19億元,即每10萬銀窩輪成交中,有略超過5萬銀係恒指輪。
一般藍籌輪,C輪對P輪嘅成交比例,喺5-10對1左右。大市升之時,藍籌C輪炒家贏多過輸家。大市跌之時,則炒家同聲一哭,輸家多過贏家幾倍。
炒恒指輪唔同,炒家做嘢唔再太過單邊。恒指C輪兌P輪成交,大約係1.4對1。
恒指C輪9252:經過幾日變化之後,明年2月27日同日到期嘅恒指C輪「4大天王」,即成交金額最勁嘅4隻,係9252、9378、9295、9372。「4大」總成交金額達8億元,即每10萬銀恒指C與P輪成交中,有4.2萬銀係「4大」。
吼低買恒指C輪博大市彈上,「4大」中𠵱家條件最靚嘅仍然係9252。邊隻最抵買,隔三兩日就因輪價步伐唔一致而有變化,炒輪要靈活。
章盛