八月二十九日，本欄講《財經演員》，順道講埋acronym，舉例如NATO、IBM、UBS。《蘋果》讀者之中，知識廣博者眾，兩封電郵立即殺到，一中一英，中文電郵來自J.Mok，英文來自A.Wong，一睇便知呢兩位都係有學問之人。
兩位讀者話，acronym與「縮寫」唔同，NATO可以發音，HSBC唔可以說，只可講出四個英文字母，前者係acronym，後者係abbreviation（縮寫），兩者有別。兩位讀者指左丁山混淆者，應該更正；你兩位係啱嘅，但係語言之運用，有其時代性，亦有約定俗成（學者會話係積非成是）。好似acronym與abbreviation咁，上網睇吓Wikipedia網站，講acronymandinitialism，就指出，acronym與initialism同是縮寫，前者可發音如radar（雷達，源於RAdioDetectionAndRanging），後者如KFC、IBM。較保守人士仍然堅持兩者有別，不可混為一談，但此說已經過時，幾乎全世界皆以acronym一字代表這兩個意思。
左丁山唔算有混淆，不過從俗將IBM與NATO視為同是acronym啫，多謝兩位讀者指教。A.Wong先生出問題考左丁山，IBM係縮寫，NATO係acronym，咁樣Amex（AmericanExpress）又係乜嘢？左丁山諗咗一輪，唔敢肯定，不如你教我嘞。
J.Mok與好幾位其他讀者都同時問原復生復出寫稿，邊度可以睇到，佢哋好想睇。人家秘密，無謂透露，總之佢以前寫開邊張報紙，你哋自己仔細啲去找尋啦。一位受歡迎嘅股市專欄作家，確係有擁躉嘅。
讀者Peggy話佢經常去日本，覺得日本禁煙好徹底，唔係左丁山寫到咁差（九月三日本欄）。日本人的確好守秩序、好乾淨，但如果你朝早時分去涉（澀）谷地鐵站外行人天橋一帶睇吓，地面上之煙頭多過紅磡火車站。