舒淇前晚喺中環主持鞋店RogerVivier開幕禮，佢打扮得靚靚咁，重着埋對七千幾銀嘅新鞋襯佢嗰身pinklady打扮，同品牌設計師BrunoFrisoni排排企影靚相，點知個設計師就認真唔小心啦，居然掂到舒淇個胸呀，兩個人梗係尷尬啦，不過舒淇就認真好嘢，佢笑吓之後就即時回復正常，重當乜事都冇㖭呀！
舒淇接受訪問時重好盡責咁幫鞋舖宣傳，佢話：「男人最鍾意睇女人足踝同小腿，我都覺得女人着高跟鞋特別性感。我小腿OK啦，天生係咁，好多朋友羨慕我肥人唔肥腳，媽咪反而話我『雀仔腳』太幼唔靚喎！」
有人追拒提黎明
舒淇又透露返香港一個星期，為《怪物》拍煞科戲，重會幫朋友揀伴娘衫㖭，中秋先至返台灣同屋企人過節。唔知佢有冇情人陪佢賞月呢，點知佢就話未搵到喎！一提到黎明佢重即時話唔講㖭！只係肯認圈外人追緊佢，舒淇重話：「我好耐冇拍拖，不過都唔恨嫁，我重有大把時間，理想同真實係兩回事。」
採訪：顏英儀 攝影：陳志嵐
