四川成渝（107）係慣性落後公路股，唔敢望一飛沖天，策略性炒波幅，都有得諗吓。成渝05年度中期（6月止），純利升咗近4成到1.6億元（人仔．下同），張成績表過關。再睇番成渝個網站，集團旗下成渝公路最新7月及8月收入5606萬銀及5827萬銀，同比分別微跌1%及增加3.9%。至於另一條成雅公路，8月未有數據，而7月收入有2036萬銀，增長近6.6%，換言之，踏入下半年，收入拉勻計重係向上。
再講，成渝最新NAV1.86元，現價1.17元相對折讓37%，公路股有咁嘅折讓，數一數二，有資產墊底，業務數據暫時唔曳，就算成渝唔大升，亦搵唔到理由要大插。最近三個月，成渝喺1.11元至1.25元之間上落，短期就喺呢段橫行區高沽低揸，又若然跌穿1.11元，可以將炒賣波幅下移到1蚊到1.11元，十格八格，應該有啲油水撈吓。
達成折讓大遲早彈
達成集團（126）往績PE6倍，息率6厘，睇數據流口水，但隻股好似點咗穴，唔點郁，又講兩點：第一，達成05年度（3月止）營業額6.8億銀，不過升咗12%，但純利近翻半番，跳升到3473萬銀，重要原因之一，係新製作深圳華南工業原料城，有1900萬銀溢利入帳。要咁睇，華南城去年先起動，樂觀預測，新業務可加大未來純利爆發力度；保守去諗，又可抵銷其他核心業務，尤其係成衣業波動情況，06年度照計keep住低PE。第二，達成最新NAV1蚊多少少，現價0.32元折讓高達69%。大熊市中有呢個折讓唔出奇，家陣隻牛返咗嚟，重有咁嘅折讓，有啲唔合理。呢類低殘股仔，趁低收集，遲早彈。
錢雋