我知，我知道你懶，我知有廚師幫你燒埋就梗係食得舒適，但如果想一班朋友/一家大細享受BBQ樂趣，點解唔試吓去大型的BBQ場，自己郁手燒嘢食？中秋節期間，有很多BBQ場還會推出應節的活動，讓你享受燒烤樂之餘，價錢平過大廚Serve多多聲，重包埋其他玩樂，抵呀！
記者：梁學文
攝影：黃子偉、陳陶鈞
Models：Phyllis、Elyse、陳彥丰（TheGroup）
去白石燒乳豬打高球
位於烏溪沙的白石俱樂部集飲食玩樂於一身，讓你可以由朝到晚玩足一日。俱樂部內有一個可以容納5,000人的無敵海景燒烤場，約埋一大班Friend去玩就最適合。而且個個爐都可以望到吐露港宜人景色，一邊燒嘢食，一邊遠眺美景，一樂也。場內提供80多款燒烤食物，總有一款啱到你。在眾多款食物中，最特別的是招牌燒乳豬，乳豬成隻任你燒，過癮又好味都係收$198。除了食，這裏還提供150條高爾夫球練習球道，此外還有一個新落成的遊藝墟，提供多種特色攤位遊戲，大人細路都玩得。在中秋節，這裏還會有中秋晚會，有燈謎猜之外，又提供材料俾你做燈籠。要一大班人搵靚景賞月，啱晒啦！
金牌乳豬$198
每隻乳豬足5、6斤重，好好肉，而且豬仔只是出世幾日，一來不會太肥膩，二來肉質比老豬嫩口好食。每隻乳豬大約要燒兩個鐘，你可以一邊燒其他食物，定時轉吓隻豬就可以。BBQ乳豬，就最緊要在差不多燒熟的時候在表皮拮窿，令豬油和汁可以滲入皮中。燒好的乳豬皮脆肉滑，入口有少少肥，好好食。不過中秋想燒乳豬記得趁早預訂噃！
燒羊髀$48/2隻
炭燒羊髀大大隻，燒完就可以成隻拿着咬，原始風味十足。燒羊髀少不免羶羶哋，不過一點也不羶又怎叫做羊呢？入口嫩滑又唔肥，炭燒味道更勝一般焗羊髀。
秘製乳鴿$38
有乳豬燒外，重有乳鴿。這裏的燒乳鴿特色之一，是他們用上特別炮製的醬汁和醃料。入口香甜，大家要親口試試。
秋刀魚$30/2條
原條燒秋刀魚，原汁又原味，加兩滴檸檬汁就更正。秋刀魚由有牌魚販供應，可以放心食。燒魚好快就會熟，燒到個皮少少燶就夠味。
蜜椒牛柳條$48/磅
蜜椒即甜椒，用它來醃牛柳味令牛柳帶點甜味。牛柳條肉質較嫩，而且切成一條條快熟又易食，轉眼就清晒。燒烤一定有牛扒，不過很多時也會食剩，特別是女士較多時，牛扒就剩得更多，不如改燒牛柳條啦！
白石俱樂部（26319900）
地址：香港新界馬鞍山白石
座位：約5,000個
營業時間：11:00am-4:00am（中秋節期間）、11:00am-11:00pm（平日）
泊車：有大量車位，免費任泊
優惠：凡惠顧BBQ滿$500，均免$80開爐費；滿$600奉送一小時高爾夫球任打
交通：在馬鞍山新港城有免費穿梭巴士前往，平日每小時一班。班次詳請可以瀏覽他們的網頁
網頁：http：//whiteheadclub.com
去大埔燒鹿扒舞火龍
如果你喜歡在大自然過中秋，這會是一個不錯的選擇。它開設在白鷺湖畔，你可以下午到湖中垂釣，釣到魚的話還可以即晚燒烤。在戶外的燒烤花園，除了可以享受自助燒烤樂之外，居高臨下的天台花園還讓你飽覽整個湖畔宜人的景色。
在中秋節期間，他們會舉辦一連串應節活動，如舞螢光火龍和放湖燈等，還有攤位活動畀你玩。凡在9月17-19日惠顧，都可以免費試放孔明燈或湖燈，認真應節。要去記得早點訂座。
波士頓龍蝦$188/隻（後）
老虎蝦$45/隻（前）
老虎蝦大大隻，鮮味十足。原隻燒波士頓龍蝦，不用加太多調味料，讓你食到龍蝦的原汁原味，蝦肉鮮甜無比。
燒排骨$78/件
泰式燒排骨以洋葱、乾葱和泰國紅辣椒等材料醃製，少少辣，燒完更加惹味。燒排骨最好先用猛火燒一燒外皮，鎖住肉汁，再以細火慢慢燒熟。
鹿骨扒$90/4安士
有人可能嫌羊扒一陣羶味，又或者嫌豬扒太肥膩，不如試吓鹿骨扒，一來不會有羶味，二來肉質嫩滑又唔肥，不過食完鹿扒個身會㷫㷫哋。
食客有Say
譚小姐：「環境好好，我第二次來燒嘢食喇。」
嘉里白鷺湖互動中心（26576657）
地址：大埔紅林路2號
座位：約350個
營業時間：6:30pm-11:30pm（燒烤）
交通：9月17-19日中秋節期間，穿梭巴士每日11:00am-4:00pm由大埔墟火車站循環往返嘉里白鷺湖互動中心，費用全免。
