我相信有一部份人仍然認為拍電影的人或從事戲行的人等同「撈偏門」的工作，即係做埋啲唔三唔四嘅嘢。我估其中有一個好重要原因係佢哋成日都見到我哋拜神。
咁你話成日落街都見到阿婆拜神，唔通阿婆係「撈偏門」？我哋啲拜神好唔同，阿婆拜神通常都係自己一個人拜，最多約埋隔籬屋個阿嬸，目的通常係一啲好細小嘅願望。
我哋拜神就誇啦，可以係頭條新聞，可以係搶位出風頭嘅時候，可以係權力顯示嘅時刻。同願望無關，同慾望關係大啲。直接令人聯想起某啲社團儀式，基本上企得喺乳豬頭前面摸到把刀再影到兩幅相就係整個儀式嘅精華所在。
我認識嘅人裏面，最鍾意拜神嗰個叫劉偉強，佢本人話自己係一個天主教徒，但係基本上乜神都拜，自從我同佢合作後，我對拜神嘅知識增進了不少。首先每部戲未開拍前都要去搵師傅改名，擇日開鏡。然後正式開鏡前又到濟公廟拜一拜，再有開鏡拜神儀式，即係記者會嚟影相。去到外地拍戲，當地嘅神又要拜，然後拍戲嘅時候例必每日上香，部戲完成後要再到濟公廟還個神，然後又要去多謝師傅一次。係咪幾得先？有朋友問我係咪真係變咗個咁迷信嘅人？你唔好理，劉偉強拜吓拜吓，拜出個未來，就快去荷李活同李察基爾一齊拜。
所以其實拜神唔緊要，最緊要拜得啱，但求心安理得就拜乜都冇所謂，如果心術不正就拜乜都係假。我都係覺得劉偉強……勁！