等到啦，等到啦，太陽終於無咁㷫烚烚，耳伴微風無咁滾熱辣；係時候除低老西、放低電腦槍Game，玩真正嘅WarGame！今日玩嘅WarGame都幾唔簡單，除咗有草叢戰之外，重有迷你電單車跑道戰、水上電單車湖上戰；迎住涼風拼搏，超爽！
記者：盧家蕙
攝影：楊錦文
Models：Calinda、Ben、Lawrance、Cherry（Salvador）
一行4員打WarGame，未入場已經先興奮，大家一見到湖水，唔理三七二十一，就衝入去水上電單車區！且慢，響香港玩水上電單車要有牌照，加上要響水面平衡、感應速度，絕對有一定難度，梗係要Mark住教練先至玩得安心。
勁高難度 死跟教練
除非你係天才，否則無咩可能一玩水上電單車就可以開到槍；所以大家都好有耐性，聽教練講解、檢查機件、親自入電油等。教練坐上駕駛位後，就可以舒舒服服緊跟住佢，享受由教練帶嚟嘅擺尾、片水等快感，好風馳電掣！當你已經坐定定，又或本身識玩水上電單車，就可以攞出氣槍，對住湖邊嘅靶，盡情發炮，一考眼界；嘩，片住嚟發彈，感覺好似科幻戰士！
騎5:1戰車扮華D
嫌水戰太高難度？可以試玩Mini-Motorcycle體驗！呢架迷你電單車玩具同真實電單車比例係5:1，但車速可以同真車媲美，款式由賽車到綿羊仔都有！大家聽過導師講解基本結構、安全守則、操控技巧及示範後，就嗱嗱聲，推架車上新設嘅賽道。如果你本身叻玩單車，對機器嘅操控有基本常識，就可以做個飆車手。如果你天資高，重可以攞埋把氣槍，一路快放，一路向兩邊槍靶發彈，型爆！
山頭戰啱初哥
如果你係個初哥，都係玩草叢WarGame最開心！老規矩，響導師示範一啲正統裝備運用、軍用手語及一般安全急救知識之後，就可以攞起氣槍，噼噼啪啪咁試槍去。一講開始，個個都雞咁腳咁走，有人不斷開火，有人奮力抵抗，有人甘心做炮灰，有人做咗無膽鬼，有人伺機而動……
有叉用燒烤樂園（24757095）
地址：天水圍天慈路馮家圍30號
收費：
陸上WarGame$300/6-8小時（送任食BBQ5小時）
水陸WarGame$350/6-8小時（送任食BBQ5小時）
Mini-Motorcycle體驗活動$350/4小時（送任食BBQ5小時）
水上電單車$30/5分鐘，水上電單車課程$680/4小時
獨木舟$30/半小時
交通：西鐵天水圍站，乘的士約$20
備註：活動須20人或以上，須預約