衞生福利及食物局修改吸煙條例，好多市民都關注究竟係咪全部室內工作間都要禁煙，其實政府建議中，有一條對萬事發呢個牌子可能影響重大，因為政府建議日後為免誤導，煙包上面一律唔准用醇、特醇、Light同Mild等字眼，以免市民以為食呢啲煙危害會少啲。
結果唔使八方講你都知，如果係咁，MILDSEVEN呢隻牌子，因為個名有MILD字，有可能玩完，呢隻煙間公司日本煙草涉外企劃部次長山下和人同八方呻，政府修例唔可以搞垮產品嘅商標，否則可能同《基本法》內保障知識產權、商標條例甚至世貿協定有衝突，希望政府諗吓。
山下和人重希望港府好似日本政府咁，要求煙草商喺包裝上面解釋MILD字眼唔代表對健康影響比其他產品小，即可免市民誤會，其實萬事發只佔香港煙草市場一點二巴仙，佢哋咁緊張，係唔希望其他地區政府跟隨香港做法，八方問港府點，佢就話唔評論個案。
傳真︰2623-9278
電郵︰[email protected]