韓國人氣歌手Rain會喺下個月八號同九號喺會展開兩場演唱會，一班Rain迷又興奮又緊張，內部認購超晒額，前日公開發售又大排長龍，一個鐘頭就賣晒啲飛，連主辦人之一嘅邱王黎寬都話搵咗三十個員工出去排隊，但都無功而回。
平飛炒到七百
咁嘅情況當然係黃牛黨搵錢嘅好時機，噚日馮仁昭就喺網上面見到，有人將Rain演唱會嘅飛放喺拍賣場度炒，其中有人自稱有兩張優先訂購得嚟，十月九號嘅二百五十蚊飛，話係靚位，以七百蚊起價供拍賣，每口叫價二十五蚊。又有人將兩張十月八日嘅五百八十蚊貴飛拍賣，不過底價一蚊。
雖然呢兩位炒飛人士唔算大貪，但咁炒飛係唔合法嘅，年前就試過有人將許冠傑嘅飛放上網炒賣俾警方拉咗。有供有求，拍賣場上竟然有人徵求兩張Rain演唱會門票，重寫明肯出五千蚊，如果佢唔係整蠱人咁呢個歌迷一定愛Rain愛到飛起。
