令人引頸以待的香港迪士尼樂園後日正式開幕，究竟本地迪士尼有幾好玩？日前本報邀請了梁洛施（Isabella）到樂園試玩，在四小時內喪遊迪士尼，玩盡「明日世界」、「探險世界」、「幻想世界」和「美國小鎮大街」四個主題公園。
當日Isabella早上九時許抵達欣澳站，試坐迪士尼地鐵專車，當她一踩入樂園，馬上殺入「明日世界」激玩三款機動遊戲，早餐雖還未落格，但就膽粗粗試玩被形容為最刺激的機動遊戲──飛越太空山，然後排隊連玩六大遊戲。
Isabella表示十歲時去過美國迪士尼樂園，她說：「我覺得LA迪士尼超好玩，但嗰時太細好多嘢都玩唔到，今次重唔玩番夠本？可惜香港迪士尼比較細，但我諗成家人天倫樂，或者小朋友嚟玩都應該好開心。」 採訪、攝影：朱倬誼
森林河流之旅：動物逼真生動
點玩：位於探險世界，坐大木船環繞河流一周，有船長做導遊，沿河有大笨象、河馬、斑馬、長頸鹿、猩猩和鱷魚等道具動物以及噴火的火燄山。
評語：「OK啦，扮船長嘅職員由頭到尾畀足心機講解河流之旅，冇悶場，值得一讚，啲道具動物都幾生動，大笨象鼻哥噴水好盞鬼。」
好玩度：＊＊＊＊
歷奇噴水池：狂噴水濕晒身
點玩：圖騰柱上的小孔噴水，失驚無神會令你濕身。
評語：「圖騰夠高、夠宏偉，雕刻精緻，但等咗好耐都唔噴水，水亦噴得唔夠多，再噴勁啲會重好玩。」
好玩度：＊＊＊
灰姑娘旋轉木馬：啱晒小朋友玩
評語：「比較靜態，木馬好唔好玩見仁見智，可能小朋友會玩得開心啲，但比一般香港遊樂場嚟講，呢度嘅木馬有幾十隻，款式算多。」
好玩度：＊＊
飛越太空山：布景音響出色
點玩：乃室內過山車，坐火箭車高速穿梭漆黑中布滿宇宙星體的太空隧道，火箭車不斷扭動、轉彎和急墜，配合音響聲效，頗有漫遊太空feel。
評語：「太空布景好靚、好真，音響都幾勁，不過原先以為好刺激，但架車得個快字。」
好玩度：＊＊＊1/2
小飛象旋轉世界：象仔造型得意
評語：「隻象就夠晒得意，可惜冇特色。」
好玩度：＊＊
太空飛碟：高低旋轉不停
點玩：坐在飛碟上三百六十度高低旋轉，升至最高位時約有兩、三層樓高。
評語：「係咁飛嚟飛去，唔夠快，好慢，但升起時都有少少高。」
好玩度：＊＊
巴斯光年星際歷險：車仔自轉過癮
點玩：坐在太空車內經歷互動式探險旅程，以手槍射殺障礙物和怪物。
評語：「攞住支槍射怪物，唔係咁好玩，開槍嘅音響唔夠勁，但坐緊嗰架車仔有時會突然自轉，都幾好笑，布景同燈光都算靚。」
好玩度：＊＊＊
嚇親你垃圾桶
Isabella漫步之際，神秘垃圾桶忽然滑行路邊，邊行邊發聲：「姐姐，摸吓我呀！」嚇到Isabella當場彈開兩步，但她亦聽話輕拍垃圾桶，垃圾桶即刻畀反應：「姐姐，你隻手好軟呀！」認真抵死。
（編註：五個＊為滿分）
