話咁快，國家副主席大曾曾慶紅已經到咗深圳，今日就會浩浩蕩蕩過河，直奔紅磡李超人間酒店安頓行宮，然後再過海上山頂去細曾曾特首嘅維宮食餐飯，挺一挺呢個爵士門生；休息一晚之後，禮拜日就係大曾嘅showtime啦。
今次南巡，當然係恩威並施，所以一早就話大曾會做聖誕老人，送大禮畀特區新政府。嗱，話口未完，前財長項懷誠打骰嗰檔社會保障基金，噚日就宣布話會攞筆錢嚟香港投資，一於撐起個股市。跟住又話會批准濟南、青島、瀋陽、大連四個北方城市二千六百萬同胞來自由行，等佢哋唔去大明湖去迪欣湖，唔飲青島啤飲生力啤。總之你細曾只要乖乖哋，就要錢有錢，要人有人，有大曾呢個靠山，特區今次真係想窮都幾難！
除咗送禮，大曾當然亦會在特區顯示吓領導人嘅威儀，所以禮拜日佢唔止見班富翁同中資幹部，重一定落區，以供萬民瞻望。咁去邊呢？呢個就係國家機密啦，除咗人人都知佢會去香格里拉個大party，副主席當日嘅行程，係唔可以講嘅。
放低支炮先入場
咁落完區親完民，禮拜一就做埋啲手尾，幫剛剛獲得「美國租界」稱號嘅迪士尼剪綵，然後就大功告成返歸去。講到呢個米老鼠樂園，都算威水，得到領導人青睞，政府、商界大合唱唱好，可惜臨開幕衰收尾，竟然要衞生督察除帽剝章，激親食環署班公僕，搞到成套精采公關安排喎咗，你估佢下個禮拜會唔會叫副主席嘅近身放低支炮至入場呢？
衞生幫之外，民間團體及工會都對米老鼠有惡感。香港天主教區刊物《公教報》，最新一期就有篇題為〈香港迪士尼開幕啦──風光下的悲哀〉文章，話香港迪士尼「注定是一具文化殘屍」。佢話中、港遊客入到樂園，只顧玩刺激感官嘅機動遊戲，而唔明白每個迪士尼人物、每套迪士尼卡通背後都有一套「隱性」價值觀，教導小朋友善惡公平等觀念，因此就算迪士尼設喺香港，入場玩嘅中國人都唔會「進入西方文明的深層精髓」。
篇文重批評請國家領導人主持揭幕禮唔妥當，認為迪士尼既非國企又非慈善機構，質疑官方種種安排混淆咗商業機構同執政者嘅關係，認為大小二曾應該排隊購票入場，才能顯示民主中國真正存在。
其實樂園由港府同迪士尼合資經營，各佔五成四同四成三股權，迪士尼真係「國企」，市民入唔入去玩，都已經每人科水四千蚊「入咗股」啦。
傳真︰2623-9278
電郵︰[email protected]