銀行公會主席和廣北，噚日如常到公會位於中環太子大廈五樓的大本營主持記者會，傳媒除咗問吓息口、按揭等「例牌菜」之外，最有興趣知道，就係究竟中銀係咪涉及北韓核計劃融資一事，正被美國執法機關調查。
和廣北本身係中銀頭頭，但佢話要到會議室外，先至肯回答中銀嘅問題，因為在銀行公會嘅地方，討論中銀嘅嘢似乎唔係好恰當，真係好小心。
不過為咗方便傳媒工作，平時並非「心太軟」嘅和廣北，最後同意留喺原位回答記者問題，但係就即時施展「移形換影」大法，好似舞台劇換景咁，佢將枱面寫住「銀行公會主席和廣北」個牌調轉，由原本面向記者，變成對住自己；中銀嘅同事重搞笑，竟然㩒掣將和總裁身後塊屏幕放落嚟，遮住「銀行公會」個牌匾。和廣北嘅身份，就咁由銀行公會主席，變成中銀香港副董事長兼總裁喇。
傳真︰2623-9278
電郵︰[email protected]