由香港貓迷會主辦的「第九屆冠軍貓展」已圓滿結束，向來各小組冠軍選完即各走各路，今屆特別增設全場總冠軍，讓一眾組別冠軍再鬥多次。就係咁，Buddy和Natalie兩爺孫就有機會同台鬥靚，薑係老嘅辣，爺爺力壓小孫女勇奪全場總冠軍，兩個主人Alex和阿Moe開心到暈，不過勢估唔到孫女臉皮超薄，鬥輸嬲到鬧阿爺。
記者：邵超
攝影：伍慶泉
爺孫嗌大交
唔只人有代溝，貓一樣有！又難怪嘅，話晒孫女Natalie近月狀態大勇，在眾兄弟姊妹中脫穎而出，一心諗住靚絕人寰，首次參賽就攞「幼貓組」冠軍，點知全場總冠軍會輸畀「成貓組」一個阿伯，呢個阿伯重要係自己阿爺Buddy，唔喪鬧有鬼咯。
三代同堂
爺爺：血統優良
從事本地繁殖異國短毛貓逾7年的Alex，從雜誌上睇到Buddy即一見鍾情，誓要得到牠：「Buddy係美國某貓場最後1隻貓，俾一個本身都係繁殖家的買主收買，我睇到雜誌即刻聯絡，嗰個買主初頭屬意賣Buddy個囝囝，我大膽問Buddy會唔會賣，好彩最後都帶到Buddy返香港。」
Buddy在美國各大小州省舉辦的200個貓展奪冠，被譽為超級冠軍，生下的子子孫孫有成為超級冠軍的質素，Alex指自己有少少虧待Buddy：「將佢留喺美國，有望累積到生出15隻超級冠軍，香港比賽太少，今年有3次已經算好，今次貓展Buddy的孫仔孫女都有獎攞。」參觀貓展時，瞥見Buddy每次都快評判少少郁吓個身Showoff，等評判摸清摸楚，不愧是出慣大場面的老薑，老薑自有老薑的處變不驚：「我有次唔記得閂門，Buddy跳咗出花園，花園有兩隻洛威拿，但佢一啲都唔驚，驚嗰個係我，嚇得我極速抱佢返嚟。」
孫女：活潑好動
Natalie一出道就拎「幼貓組」冠軍，但同阿爺比就望塵莫及，皆因Buddy由細到大攞獎攞到手軟，不過論反斗事迹，爺爺就拍馬都追唔上，Alex說：「好多人都話Natalie似豹，講得無錯吖，同胎生咁多個BB數佢最活潑，其他兄弟姊妹隻隻成尊佛咁成日瞓，佢就好鍾意玩又鍾意嗲人，會瞓喺你床邊摸你塊面。」不過咪睇Natalie跳跳扎冇王管，一遇上Buddy就不自覺依依哦哦耷晒頭，心裏其實好驚至真。
名貓護膚心得
天生麗質難自棄，Buddy同Natalie的皮膚一樣咁嫩滑，秘訣在於食物與情緒控制。兩爺孫慣食乾糧，戒食零食，連Supplement也不需要，加上保持心境開朗，皮膚和毛髮自然滑一滑。Alex𠱁Buddy開心的方法很簡單：「佢鍾意人叫佢個名，同佢有多啲身體接觸就表達到你係錫佢、鍾意佢。」貓是種講情緒的寵物，長期活在不穩定的環境會令情緒不穩，一有壓力健康會變差：「濕度都會影響皮膚同消化，香港天氣太潮濕，養貓嘅人買部抽濕機好過買部冷氣機。」
爺孫爭嘢玩
兩爺孫今日好唔啱Key，拍照當日除咗嗌大交，重爭嘢玩㖭，小記一遞毛冷畀佢哋，懶洋洋坐喺梳化上面嘅Buddy即刻死纏唔放，重擠眉弄眼咬到毛冷實一實；處身梳化底的Natalie唔忿氣無嘢玩，起擒狂扯毛冷與爺爺角力……
