分析師Ｅ下個禮拜放假，問佢去邊度玩，佢話與老婆、乖乖仔去北海道，正為天氣發愁。左丁山話唔使驚，颱風彩蝶呢幾日橫掃日本，直撲北海道，下星期應該雨過天青，天氣轉好咯。北海道似乎幾好玩，馬主Ｈ啱啱去完，一走咗就打風；基金Ｐ話佢鍾意冬天去北海道滑雪；律師Ｆ話佢舊年去過租車遊覽，十分寫意……
咁多人去北海道，大概有兩個原因，第一，東京大阪京都一帶，去過唔止兩次；第二，北海道空氣清新，大自然環境不受城市化破壞，函館小樽呢類小城市，別有風味，基金Ｐ就鍾意喺小樽住兩三日，成個人神經鬆弛晒。當然，日本無論城市鄉村，每處嘅廁所都非常乾淨，遊客唔會中招。近富良野有一個小市叫做三笠，位於山區，山中有大沢（澤）湖，湖邊有溫泉旅館，清幽雅致，純以本地人為生意對象，浸溫泉只需四百日圓（二十九蚊港紙），抵到爛。
分析師Ｅ嘅乖仔係讀書神童，明年大學畢業，行畢業禮之時，先至夠二十歲。今年暑假，Ｅ仔入咗一間美資大行（投資銀行）嘅新加坡分行做intern，有房屋津貼，有幾好嘅人工，通常如果做得好，投資銀行就會明年待Ｅ仔畢業之後，送上聘書，三十歲前Ｅ仔就可以買波子、買層樓，做其單身貴族，講銀紙好過做中學教師多多聲。
不過Ｅ仔經過暑假之後，有新嘅領悟，了解到做banker係非人生活。乜唔係啫，凌晨四點仍未放工，早上八時又開始第二日嘅工作，每日平均工時係朝八朝一，十九歲仔都捱到殘。Ｅ仔嘅部門大波士，屬董事級，差唔多每日凌晨兩點都會打電話畀Ｅ仔畀指示，Ｅ仔頂唔順之餘，亦好同情佢嘅大波士，因為呢位老闆嘅太太回港產子，兒子出生後兩星期之內，董事點都抽唔到時間返港安慰太太，見吓個仔。Ｅ仔認為自己不需要太多金錢，過正常生活更有意義。