可能家吓啲人真係有錢咗，所以二手市場多咗人搵特色單位，近日就有兩宗。
何文田雅麗居複式連天台，近日以一千三百二十八萬成交，據中原廖智佳講，呢個單位有一千九百幾呎，呎價六千九百七十一。由於同類單位喺成個雅麗居只係得兩個，供應甚少，嗰位區外買家又鍾意天台，睇完樓冇耐就決定購買，諗住自住。
至於另一單係干德道君德閣千八呎，連天台複式向海，天台有四百幾呎，成交價一千二百四十萬，買家係外區外籍租客，睇咗三日就落槌。
聽中原黃國明講，呢個屋苑只得四個複式連天台單位，兩個向山，另兩個向海。
兩宗個案重有相同之處，就係上手業主都要蝕，雅麗居嗰位，九五年以一千四百一十萬買返嚟，而君德閣嗰個，係九七高峯期以二千四百萬入貨。