恒指噚日波幅107點，埋單跌0.40點。長實（001）係升幅最大嘅恒指股，進帳1元，帶動恒指升7.4點。暫時炒輪搵錢難度高，1隻股票忽然由強轉弱，或由弱轉強，無從捉摸。好少人估中建滔（148）派中期成績表前幾日氣若游絲，派成績表後可以彈升1.45元。
建滔窩輪：建滔窩輪有兩隻，1隻備兌C輪9121（由發行商發行），1隻公司輪150（04年10月由公司送出，每10股獲送1份）。9121收24仙，升39%，成交金額58萬。150收3.325元，升21%，成交金額94萬。兩隻輪雙雙打入窩輪龍虎榜頭兩名。
咪羨慕揸咗9121嘅人昨日撈嘢，如果喺7月下旬（只不過係個幾月前嘅事）照發行商發行價54仙攞貨者，到𠵱家仍然蝕緊56%。隻輪明年4月夠鐘，輪價24仙，溢價26%，槓桿率8.2倍，有效得3.9倍，引伸波幅則高達55.3%。以咁嘅數據追貨，祝你好運。
150好長壽，06年底至夠鐘，輪價3.325元，溢價18.1%，槓桿率5.9倍。呢隻係公司輪，所以冇發行商同佢計算有效槓桿率同引伸波幅。隻輪好過9121好多，但亦係博唔過。
滙控C輪3777：3777係跌幅最大嘅滙控C輪，收2.3仙，散26%，有66球易手，喺有成交嘅死火輪榜上，排名阿3。本月30日最後買賣（剩番15個交易日），正股（005，現價126.70元）上唔番130.50元行使價，隻輪就係咁先。今年2月最高價56仙，到𠵱家跌剩4%，又1個例子話窩輪係用嚟炒唔係用嚟揸嘅。
章盛